September 12, 2022; Mizoram sawrkar hnuaia a nghet loa thawk, muster roll, workcharge leh provisional employee te leh group C leh D te August thla hlawh pek an nih hnuah vawiin atangin group A leh B te hlawh pek tan an ni.

Mizoram sawrkar hnuaia a nghet loa thawk hrang hrangte August thla hlawh chu September ni 1 atang khan sawrkar treasury ten an lo pe chhuak tawh a, chumi hnuah a ngheta thawk (regular) group leh C leh D te pek leh an ni. Tarlan tawh thin angin, Mizoram sawrkara a nghet loa thawkte hian sum leh pai dinhmun a that lai chuan ni 20 chho vel ah hlawh an la thin a, a nghet a thawk group A atanga group C te pawhin a rualin hlawh an la thin.

ZALEN thudawn danin, vawiin atangin group A leh B te hlawh tur chu treasury ten an release a, thla hmasa khan Mizoram sawrkar a a ngheta thawk te chu August ni 10 atangin July thla hlawh pek an lo ni tawh.

Tun dinhmun a sawrkar hnathawk te hlawh pek tlai an nih nachhan hi Mizoram sawrkar sum harsatna vang niin, finance department chuan August ni 4 khan centrally sponsored scheme (CSS) sum pek chhuah a nih avanga Mizoram sawrkar sum dinhmun that loh chungchang sawifiahna a lo tichhuak tawh.