ZALEN October 28, 2024 : Vawiin khan ZPM General Headquarters chuan Party Office ah chhung inkhawm an hmang a, thusawitu Home Minister K. Sapdanga chuan kumin Kristiante hunpui Krismas leh kumthar vuakvetah Halpuah leh halmawi khap tlat a nih tur thu leh sawrkar hnathawk halpuah leh halmawi phur leh hal an awm chuan na taka hrem an nih tur thu a sawi.

Home Minister chuan, “Kristmas hunpui kan lo hnaih ta hle mai a, ZPM a sorkar hnuaiah chuan he hunpui hi mipuiten thlamuang taka an hman theih na turin Zan vak police kan nei tawh dawn a ni. Kawngpui dungah chauh ni lovin hmun hrang hrangah mipuite thlamuan turin an awm dawna, YMA-te nen tang hovin thahnem ngai takin mipuite tan kan thawk dawn a ni. Kum 2013 a sorkarna changtute khan halpuah leh halmawi hal hun an siam ta tlat mai a, khata tang khan halpuah hal tumna rilru hi mipuiah an lo tuh tawh a, a pawi hle a ni."

"Halpuah leh Hal mawi vang hian Lunglam tha loten harsatna an tawh phaha, hriselna a thichhia a, damlote tan phurrit a tling a ni. Tin Halpuah leh Halmawi lei nan hian Mzioram sum tam tak a luang ral thina, hei hi tha kan ti lo a ni. Diwali hmangtute pawhin Halpuah leh halmawi hmang tawh lo turin kan ngen mek a Aizawl khawpui chhunga YMA hruaitute inhmu khawm pawhin Halpuah leh Halmawi hal lo turin Resolution an siam bawka chuvangin YMA ten nen tang rualin theih tawp kan chhuah dawn a ni. Tin, sawrkar hnathawk halpuah leh halmawi phur leh hal an awm a nih chuan sawrkarin na takin hremna a lek kawh dawn a ni,” a ti bawk.