Kolasib district Additional DC chuan a chenna in a sakna ah chhungkaw 5 in tui lakna atana an rin pipe chu a tihchhiat saka, pawikhawihtu an dawr hlawhchhama, PHE lamin a tichhetu in a siamna tur pawisa a chawi chauha an siam theih thuin an lo chhang a. Addtional DC chu hmu lehin thla khat lai tui an nghei tawh thu leh a tihchhiat a nih vanga siamsak tura an ngenna a lo hnial fithla leh a ni. Chhungkaw 5 mangang te hi Media hnenah an tlan ta a, annin an manganna te chu media lamah an lo tarlan sak ta a ni. Journalist intelkhawm pawl hian chhungkaw 5 te manganna hi DC hnenah thlenin Addl. DC chu zilhhau a nih hnuah chawi tirin Addl. DC chuan chanchinbu pakhat chu advertisement chheh hran tawh pek lovah a vau a. Hemi hma pawh hian he officer vek hian National Highway sirah a insakna vung a dah tawha, ruah a sur avangin two wheeler ten an zawh thei lo a, police in tifai tura thu an pek a zawm duh loh hnuah DC hnenah thlen a lo ni tawh a ni. He officer vek hian journalist tour-a kalte Guwahati Mizoram House ah room a pe duh loa, MJA Hqrs. in an lungawilohna thu Press release hmangin an puangzar tawh bawk. Ngun taka ngaihtuahin chhungkaw 5 in an ngiat hi a awm hle a, media a tlan mai loa mawh latu nia an hriat an hmachhawn hmasa pawh hi tih dan phung a ni a, an beidawn hnuah media an pur hi a awm lohnaa awm lo. Tunhma deuh kha chuan Sawrkar hna lawk thawk te hian an cho zawng emaw, an ei loh zawng an tina fo thina, a nihna takah chuan heng mite rawngbawl tura rawih an ni zawka, thuneihna hmatheha hetiang tih ching an la awm hi a mak hle a, a changkang lo tawp a ni. Tun hnai mai a hetiang a thleng hian rilru a ti kalthui duh hle mai, Government chhiahhlawh zawkin mahni pu te a hrawk khawr khawr a nih chuan a hna awmzia a hre lo a, thawk tlak lo a ni tihna a ni ang. Chutih rualin officer nihna sang tak chelhin mipui hriattir atana sawrkar sum dah ama hlawkna tura a hmang hian journalist te rilru a ti na khawpin a hriat a, Editor a vau pawh hi pawl hruaitu, Kolasib atanga Aizawla cancer treatment la lai a ni leh zel a ni. He officer hian a MCS puite lakah mawh a nei tih a inhre lo nge ni a, a hrereng chungin a palzut lui tih hi hun reilote chhungin media community titi a tling ta der mai. Khawtlanga tihawma mawi/ inhrilh ngai loa a nachang hriat 'Civic sense' nei lo officer hi vantlang hriat khawpa Sawrkar office a chelh ti mualphotu a ni a, action lakna awm tak pawh a ni e. Kawngpui sira lei vung chhek leh buaina a thlen eng teh chiama la lo, sawrkar bungraw tihchhiat a pawi tih zirtirtu turin a palzut a nih chuan mipui a dem ngawt thiang lo ang. Advertisement hi sawrkarin mipui hrilh hriatna atana a tih a ni a, hmalakna hrim hrim emaw hnathawh tur leh thildang inhriattirna tura duan a ni a. In tanpuina a ni loa, hmanrua zawk a ni. Jounalist vau duh officer hian dan leh hrai a hre lo em ni? Engtia Sawrkara lut nge a nih tih hi zawhna a awm ta e. Officer lian ni tur chuan lehkhabu chhung piah lamah 'thil nih dan hriatthiamna, an chhehvela cheng te mizia, awm leh mawi' thlengin a hre tur a ni a. Journalist vau hi zalenna in rahbehsakna a ni a, civil mi chu thu hran, midang hrilh hriat hnathawk te zah derna lan tir lova dan pela a vau a nih chuan dictator ram rethei takah pawh thil thleng tawh ngai mang mang lo a ti tluk a ni. Hrilhhriat hna luhchilh avanga retheih huam journalist te hi Sawrkar hian protocol ah pawh lam hmasak zingah a telh zela, lehkhathiam thalai te'n 'responsible journalism' awmzia hriain Zoram hi an vil tawh a, an hnathawh haisak chi a ni lo. Zalenna hi India Danpui ah pawh a hmasa lama inziak a ni nghe nghe. Fundamental chanvo hrethiamlo officer hian tun tuma a thil tawn atang hian, 'dan' a hre kilh kelh lo a nih pawhin a rawngbawl saka te tal a hriat phah beisei ila! Sawrkar pawhin a thlen tawh lohna turin hma la se a tha ang.