Aizawl : Mizoram sawrkarin mipui tana test awlsam zawka a tih theihna tura siam Kiosk ah nitin mi 700 chuangin RAgT test an hmachhawn thin niin  chhut theih a ni a, heng hmunah hian positive rate a sang viau hlawm. 

Test neihna zingah hian Vanapa Hall chu lun ber a ni a, anni hian RAgT test-ah chawhrualin mi 150 atanga mi 200 vel an test angin an chhut tih thawktute chuan ZALEN an hrilh, hetiang zat vel bawk hi Fluorescent Immunoassay ( FIA ) hmangin test a ni thin bawk. Vanapa Hall bikah hian RAgT bakah FIA a test na a awm bawk a, Kiosk dangah chuan hetianga test na hi a awm lo.

Dinthar Kiosk chu dawrtu ngah zual zingami niin, anni hian test tam chang chuan mi 150 bawr te an nei thin a, Thawhtanni leh Inrinni chu an buk zual chang a nih thu ZALEN an hrilh. Dinthar Kiosk a thawktute chuan Kiosk dang aiin an positive rate a san thin tih an sawi.

West lama Kiosk test neihna hmasaber Chawlhhmun lam chuan chawhrualin nitin mi 100 bawr vel an nei thin tih an sawi a, veng bila test runpui an neih chang chuan hei ai hian a sang fe thin tih ZALEN an hrilh.  ZALEN in Chawlhhmun Kiosk a tlawh lai hian mi 35 vel an test tawh atangin mi 13 vel positive an hmu tawh tih, helai duty Freddy Lalthanmawia chuan a sawi.

Aizawl khawchhungah Kiosk hi hmun nga - Vanapa Hall bakah Dinthar, Hunthar, Chawlhhmun-ah leh Bawngkawnah ah a awm a ni.