Aizawl : Finance Department, Government of Mizoram chuan Budget a hlawh dah chungchangah vawiin May 4, 2022 khan sawifiahna an siam a, a taka mamawh zat tur chhutchhuakin Budget-ah hian hlawh tur a dah ta, an ti a, 2021-2022 khan cheng vaibelchhe 336 zet hlawh tura budget-a dah chu hmansen loh niin an sawi.

Assembly Session Budget pharh zawh takah khan sawrkar hnathawkte hlawh chu “Kum 2022 atanga 2023 inkar chhunga hman tur chu a kum hmasa aia a tlem avangin, hlawh tur dah tlem chungchangah hian opposition party te chuan thuchhuah te siamin press conference hial an ko a, mipui hmaah pawh hemi chungchang hi sawichhuah a ni fo, sawrkar chuan nimin khan sawifiahna hi an tichhuak.

Finance Department chuan, "Budget buatsaih dawn hian Department tinah an hlawh mamawh zat tura chhutchhuah chu Finance Department-ah pe tura hrilh vek an ni a. Hetah hian a tlangpuiin Department ten an ven thawn leh thahnem ngaihna avangin an pe tam thin a. A tlangpuiin hlawh tura Budget-a dah hi hman sen a ni ngai lo a. Kumin kum kal ta 2021-2022 kum chhunga hlawh tur Budget a dah pawh kha tuna chhut chhuah tawh chinah chuan cheng vaibelchhe 336 zet hman zawh lohin a awm a. Hei hi chhut chhuah kim vek hunah phei chuan cheng vaibelchhe 400 chuang zet tling tura ngaih a ni. Hetiang hi a nih avangin Budget buatsaihtu Finance Department chuan kum 2022-2023 Budget-ah chuan chutiang chu a nih tawh loh nan a taka mamawh zat tur chhutchhuakin Budget-ah hian hlawh tur a dah ta a ni," tiin, " Tuna Budgeta hlawh tur dah hian daih ngei tura chhuta dah a ni e. Budget siam laia la awm lo mamawh thar lo thleng palh a awm a nih pawhin chungte pawh chu a mamawh ang zelin pek tura inruahman zel a ni ang," an ti.