Aizawl January 10, 2024 : Ministry of Rural Development chuan Mizoram-a Mahatma Gandhi NREGA (MGNREGA) hnuaia mipui Job Card holder-te hlawh tur chu January ni 9, 2024 khan Wage Component atan Rs.164.27 crore a rawn release a, tuna Wage Payment la clear loh te pawh clear vek tura hmalak mek zel a ni.

Rural Development Department, Mizoram chuan ni za inhlawhna sum-ah hian Mizoram Sawrkarin tih khawtlai (pending) engmah a nei lo an ti. In ruahman lawk ngai hrang hrang; heng - FTO siam (generate) leh Utilization Cerftificate (UC) thehluhte pawh a ti vek tawh zawk a ni. Central Sawrkarah a rang lama mipuite inhlawhna release thuai turin a dil a. Central Sawrkar pawhin a tah tawlin mipui inhlawhna leiba (liability) te hi a rawn clear thin a ni, an ti.

Ministry of Rural Development chuan ni 9 January 2024 khan Wage Component atan Rs.164.27 crore a rawn release a. Tun-a Wage Payment la clear loh te pawh clear vek tura hmalak mek zel a ni a, direct benefit transfer hmang-a mipui te account ah a lut vek dawn a ni. Rural Development Department chuan mipuite lo chiai lo tur leh dawhthei taka lo nghak hram hram turin a ngen a ni.

MGNREGA hnuaia inhlawhna Wages bik hi Central Sawrkar atanga 100% direct funding a ni a. Wage Payment hi Mizoram Sawrkar Finance Department kaltlang lo in, Job Card holder te Account-ah Direct Benefit Transfer (DBT) hmangin Central Sawrkar-in a rawn thun (credit) thin a. Mipuite inhlawhna ang zelin Mizoram Sawrkar Rural Development Department chuan FTO hi MIS-ah District leh Block tina thawktute kaltlangin a siam (generate) sak nghal thin a ni.