July 16, 2022; Mizoram secretariat building leh sawrkar pisa pawimawh hrang hrang awmna hmun, Mizoram New Capital Complex (MINECO) a pisa pui ber (main building) chu, nitin mi 150-200 bawr vek dawrtu awm ziah ang a ni a, Aizawl aiin thingtlang lam atanga dawrtu an tam tlangpui zawk.

MINECO main building a reception counter nghaktute hnen atanga ZALEN thudawn danin, office dawrtu mi chi hrang hrangte chu reception counter ah an kalna tur office leh an mi hmuh turte chhinchhiah sak vek thin an ni a, chung a an chhinchhiah atang chuan a tlangpuiin, ni khat ah chawhrualin, mi 150-200 bawr vel office dawrtu an awm tlangpui a, office dawrtu zingah Aizawl aiin, thingtlang lam an tam tlangpui thin.

Office dawrtu zingah hian reception counter a inziaklut lo pawh awm theih a nih vangin, office dawrtu hi counter lam a chhinchhiah aiin an la tam thei bawk. 

MINECO main building chhungah hian venhimna lam pawh khauh taka kalpui niin, main building luh dawn-ah police duty in, office chhung lut turte ken/ah bag te chu baggage scanner hmangin scan hmasak vek thin a ni.

Main building tualzawl a police duty te pawhin, chhun zan zawm (24hours) duty an kalpui tih ZALEN an hrilh a, tun hma atanga vawiin thlengin buaina leh harsatna tawh an la neih loh thu te, zan lamah pawh boruak a ralmuan thin thu te an sawi.

'New Capital Complex' tih hi a tir a a hming put niin, March ni 5, 2010 khan 'New Secretariat Complex' tiin a hming thlak a ni a, hun engemawchen hnu-ah, February ni 12, 2019 a council of ministers thutkhawmna a rel angin, February 28, 2019 atangin 'Mizoram New Capital Complex (MINECO)' ti a thlak leh a ni.