@ Sept., 2021 ral hma a ran vulh ti ral/sawnchhuak vek turin hriattir.

@ Thuchhuah pawi sa lova, ran vulh lui te chu quarter allotment thlenga cancel theih a ni dawn.

Aizawl; Mizoram sawrkar chuan sawrkar quarter leh a chhehvelah ranvulh phal loh a ni tih hriattirna chhuahin, sawrkar hmunpui ber pakhat Mizoram New Capital Complex (MINECO) huam chhung ramruak lai a chuktuah huan neite pawh an hmalakna titawp vek turin a hriattir.

August 30, 2021 khan Addl. Chief Secretary JC. Ramthanga chuan hriattirna tichhuakin, General Administration Department (GAD) in thuchhuah a lo siam tawh chu zawm lo an awm thin thu leh ran vulh an pung chak hle tih hriat a nih thu tarlan a ni.

Sawrkar dan dinglai angin, sawrkar quarter leh a chhehvelah tu tan pawh Vawk, Ar, Varak, Kel, etc te vulh khap tlat a nih thu te, chung ran vulh mek te chu September 2021 ral hma ngeia an ranvulh te tiral vek tur emaw an ranvulhna hmun sawnchhuak vek tur emaw a hriattir an nih thu tarlan a ni a, Ui vulhtu te chuan an Ui vulhte thlung felin, pawn lama chhuah zalen lova, thenawm khawveng leh mi nawlpui tana hnawksak lo turin an enkawl tur a ni tih tarlan a ni bawk.

MINECO huam chhung ram ruak/awl lai leh sawrkar quarter awmna hmun danga ram ruak lai, huan/lo thlai atana lo cheibawl a, thlai lo chingte pawh an awm tih hriat a nih thu leh chutianga huan siam mek leh siam tumte an awm a nih chuan an hmalakna titawp nghal turin hriattir an ni bawk.

Mizoram sawrkar hnuaia Administrative Department/Head of Department te chu an hnuaia thawk, sawrkar quarter (General pool) luah mekte hnenah he thupek hi lo hlanchhawk vek tura ngen an ni a, sawrkar quarter awmna venga Local Council chairman te pawh sawrkar hmun pawimawhte humhim kawnga theihtawpa sawrkar tawiawm tura ngen an ni bawk.