Aizawl July 1, 2024 : Vawiin khan Mizoram Samagra Shiksha leh Tharthilthlentu (TiLi) te thawhdunna Pilot Project, ‘Project Intodelh inzirtirna’ atana chu I&PR Auditorium-ah an ziak a, School Education Minister Dr Vanlalthlana’n he hun hi a hman pui. School Education Minister Dr. Vanlalthlana chuan ‘Project Intodelh inzirtirna’ hi School 10 ah neih a ni dawn a ti.

Project Intodelh Inzirtirna atana thawhdunna turah hian Samagra Shiksha aiawhin Lalsangliana, SPD in hming a ziak a, TiLi aiawhin LTL Fela'n hming a ziak a ni. He Intodelhna Inzirtirna Project hi heng school sawm-ah te hian kalpui ani ang: Govt. KM High School, Govt. Central High School, Govt. KVM High School, Govt. JL High School, Govt. Hrangchhunga High School, Govt. Mizo Higher Secondary School, Govt. Chaltlang Higher Secondary School, Govt. Zemabawk Higher Secondary School, Govt. Republic Higher Secondary School, leh Govt. MICE, Aizawl.

Minister chuan Zirlaiten nih tum hrang hrang an nei thin a, an nih tum an nih theih loh tawpah thil siam chhuah te, sumdawn te hi an hawi chauh thin a. Hei hian ngaihtuahna a ti thuiin, thlak danglam a ngaia a hriat thu a sawi bawk. "Mizoram hi intodelhna kawngah nasa leh zuala kan inzirtir a tul tul thu leh hei hi zirlai kan nih lai atanga tan a tul hle a, he project tihchhin tawhna kum 2 chhungah pawh a taka a lanchian thu a sawi. Nu leh pa te’n, 'Zirlai kan nih laiin lehkha kan zir that loh chuan hna i hmu lovang' an tih thin chu thlak kan tum. Hna hmu tur ni lova mahni intodelh tura zirlai te zirtir hi zirnain a tum a ni," a ti.

Minister chuan Phone te a in-update zung zung ang hian in update reng hi a tul a, artificial intelligence (AI) an tih te thlenga hmang thiam chho thei turin leh thilthar a awm apianga lo hmang ve thei tur te, khawvel a vir ruala zirlaite an vir ve a tul thu te a sawi. He project atang hi chuan Zirlai ten pawisa hlutna an hre leh zual dawn, nu leh pa te zahna thlengin he program hian a keng tel a ni, a ti bawk.

Tharthilthlentu Chairman, LTL Fela chuan ‘Project Intodelh Inzirtirna’ hian TEMC - TiLi Entrepreneurial Mindset Curriculum hnuaiah framework mumal zawk nena duan chhoh anih dan a sawifiah a. Pilot project anih hma hian Dr. Vanlalthlana MLA fund hmanga uluk taka lo kalpui tawh anih thu a sawi bawk. TEMC hian a tum ber chu zirlaite mahni intodelh nih tir a ni a, thu ringawt nilova a taka tih ngei (practical) tam thei ang ber a kawng inkawhhmuh a ni a ti.