Aizawl April 25, 2023 : Vawiin khan MPCC President Lalsawta chu Delhi atangin a lo haw a, Lengpui Airport-ah Congress Party hruaitu ten an lo hmuak a, Congress Bhavan-ah amah lawmna hun an hman naah Congress President chuan Treasurer Zodintluanga banna thehluh chu Vice President leh an party senior te nen an ngaihtuahho tur thu leh sawrkar tha tundin ngei an tum thu a sawi bawk.

Treasurer Zodintluanga'n banna a thehluh chungchang sawiin, "Kan Vice President Lal Thanzara te, kan senior te nen kan ngaihtuah ho ang a. A banna pawm tur a nih leh nih loh chungchang hi chu kan sawiho ang a, Mizoram mipui hriatah kan la puang ang. He harsatna kan tawh mek hi kan sawrkarna tur kawnga harsatna kan tawh pakhatah i ngai ang u. Heng harsatnate hi awm lo turin tawngtai mah ila, harsatna hi a lo thleng tho thin. Party dangte ang bawkin harsatna kan tawk ve a ni. Pathianin rem a tih phawt chuan mipui rawng bawl turin, mi rethei zawkte khaichhuak turin min hungchhuak leh ngei dawn a ni tih i ring tlat ang u," a ti.

Lalsawta chuan Congress Party-in sawrkar tha din a tum tih sawiin, "LMC-ah kan ti tha lo hle a, VC Bye Election-ah kan ti tha lo hle bawk. Mahse, Pathian kaihhruaina kawng reng reng hi kawng mam a awm ngai lo. Bible a Pathian mite kawng reng reng hi nuamsa a awm ngai lo. Beidawn rum rumna tur a tam mai. Pathian hnenah kawng mam i dil lo ang u. Beidawng miah lovin, kan goal, sawrkar tha tihhlawhtlin ngei tumin kan kal zel dawn a ni," a ti bawk.

Lalsawta chuan India ramah Congress kaihhruai sawrkar pianna chance a sang hle tih sawiin, "Opposition Party lian zawng zawngin Congress kaihhruai sawrkar siam duhin hma an la a. Kum 2024-a India rama Lok Sabha inthlanpui lo awm turah Congress sawrkar a piang ngei dawn niin a lang," a ti. Mizoram chungchang sawiin, "Party dangten Congress hi an dingchhuak tawh dawn lo an ti thin. Mahse, khu lama zawmpui nei miah lo te pawhin sawrkar an tum chuan keini chu hmabak duhawm tak nei kan ni zawk," a ti.