Aizawl April 25, 2023 : Vawiin khan Media & Publicity Dept., MNF General Hqrs chuan chanchinthar thehdarhtu te an hmachhawn a, an General Secretary VL Krosshnehzova chuan, tha ber leh thianghlim bera insawi Zoram People’s Movement (ZPM) chu sawrkar ve hrim hrim chakin an tui a hal huam huam a. Tih hreh leh tih duh loh an nei ta lo, a ti.

VL Krosshnehzova chuan, An din tirh lama thianghlim ber leh tha bera insawi thinte chu an danglam ta a. An insawi dan thin leh tuna an thil tih te chu a inpersan ta hle, a ti a,  Chakma Autonomous District Council-ah ZPM an din ta a. Hnam chhiatna thlentu tura an puh Chakma te chu fachuam enin an en ta zawk, niin a sawi.

MNF chuan, "Thinghlim bera insawi, Chakma te hnam ralna tur an nih thu thlangaupui thintu, Chakma rama ZPM an din ve loh tur thu sawi thintute chuan, lal ve hrim hrim an chak luatah an principle an kal san ta a. An lal hma hauh pawhin an principle an kalsan a, an sawi loh ang hlirin an khawsa ta a ni. Hlawkna an telna tur a nih phawt chuan dawt sawi thin leh an tanna thlak thlak thin an nih hriain ZPM lakah finkhur turin mipuite kan chah a ni," an ti.

MNF chuan MAY ni 9, 2023-a Chakma Autonomous District Council (CADC) inthlan lo awm turah pawh ZPM chuan Candidate neih loh hlauin an Party hotute’n an thutchilh mek an ti a, an candidate 13 zinga pali - Kusum Lota Chakma - Borapansuri II biala ding, Shanti Jiban Chakma - Chhotapansury biala ding, Onish Moy Chakma - Mondira Sora biala ding leh Buddha Lila Chakma - Vaseitlang biala ding te phei chu eiruk thubuai nei lai niin an sawi. Eirukna thubuai nei lai, pakhat phei chu thiam loh chan tir tawh candidate an neih duh danah hian ZPM hian an duh thianghlim lovin Politics-a an duh tawp zia a tilang, an ti.