Aizawl January 9, 2024: Vawiin khan I&PR Minister Dr. Vanlalthlana hovin I&PR Auditorium-ah kumthar inhlantharna leh thingpui inhona hun hman niin, I&PR Minister chuan opposition party leh chanchinbumi te chu sawrkar veng theitu leh khalh ngil thei ber an nih thu leh journalist pension scheme hman thuai a nih tur thu a sawi.

I&PR Minister Dr. Vanlalthlana chuan MJA leh I&PR-a thawkte chu kumthar duhsakna hlanin Mizorama chanchin lakkhawm leh thehdarh khawvelah tun hmain lemziak cartoonist angin a lo in hman tawh dan te a sawi a, "In zingah ka mikhual lo hle a ni," a ti. Sawrkar veng theitu leh khalh ngil thei ber chu opposition party-te leh chanchinbu mi media te an ni a, a bik takin ram siamthatna kawngah te, ram vei kawngah te, journalism leh journalist te hian dinhmun pawimawh tak an luah a, chumi hre reng chungin a thawhpui, chanchinbu mite chu sawrkar venpuia thurawn te pe turin a chah.

Thuthar lakkhawm chungchang sawiin Minister chuan investigate journalism ah te tan lakna tur a awm thu te, RTI hman tangkai leh zual dan kawng dap a tul thu te, tunlai journalism a thil thar data mining leh data journalism chungchanga hma thar lakna tur a awm thu te a sawi lang a. Pawl leh Sawrkar Press Release bakah mahnia chanchin thar leh thu thar lakkhawm peih a ngaih thu sawiin hemi kawngah hian tan la leh zual turin a chah bawk.

Dr. Vanlalthlana chuan chanchinbumi ten Mizoram Journalist Welfare Fund leh Press Tour te an tangkaipui chu lawmawm tiin Welfare Fund hi indaih lohna a san avangin nuai 20 atanga nuai 25 a tihpun rawt mek a nih thu te, Press Tour te buatsaih leh dan kawng ngaihtuah a nih tur thu te leh journalist te tana pension scheme sawrkar hmasa in a rem tih tawh te chu a taka hman a nih tur thu te a sawilang bawk a ni.

He hunah hian Mizoram Journalists' Association (MJA) member-te leh Directorate of Information & Public Relations, Aizawla Officer-te an tel a ni.