Aizawl; Covid 19 hripui leng vanga sorkar sum indaih loh phuhrukna tur in sorkar hnathawkte hlawh puk sak tumna a la awm hrih lo a, he thilah hian sorkar hnathawk te GP fund chu khuahkhirh zel a la ni.

Mizoram sorkar a Finance department hotute hnen atanga ZALEN thudawn danin, tun dinhmunah sawrkar hnathawk te hlawh puk sak chungchang sawi a la awm lo a, rawtna pawh a la awm lo. Sorkar hnathawkte GP fund chu pension tur leh medical lam thil tih loh a nawlpui hnen ah pek chhuah a ni lo bawk.

Finance department hotute chuan tun April thla sawrkar hnathawkte hlawh chu May ni 3 ah group C leh D te pek tum a nih thu leh A leh B ten May 10 emaw ah an lak theih beisei a nih thu an sawi.

"Central atanga installment dawn nghah zel a ngai a, chu chu thla thar ni 10 vel ah min pe chauh zel a, kan nghah hram hram zel a ngai," thudawnna chuan tiin, chumi chhung chuan group C leh D te pek thin an nih thu leh insiamrem zel a la ngaih avangin thla 2 emaw vel chu hetiang anga kal hi a la ngaih an rin thu a sawi.

Mizoram sorkar chuan nikum khan June leh July thla hlawh atangin group A-te 15%, group B-te 10% leh, group C leh D-te 5% a lo puk sak tawh a, hei hi sorkar chuan a pung awm loin instaltment-in a rul leh vek tawh thung.