Aizawl: Mizoram sawrkar in central a tanga National Rural Drinking Water Programme (NRDWP) sum a dawn te a hun tak a pek loh vanga sum a chawi tur vaibelchhe 1.82 chu a pe lo niin CAG report ah tarlan a ni.
Ni 13.3.2019-a Mizoram Legislative Assembly a pharh tak ‘Report of the Comptroller and Auditor General of India on Social, Economic and Revenue sectors for the year ended 31 March 2017’-a tarlan danin NRDWP sum lokal te chu ni 15 chhungin pekchhuah zel tur tih a nih laiin Finance department chuan kum 2014-17 inkar chhunga central atanga pawisa an hmuh vbc 76.31 zinga vbc 16.75 chauh a hun takah an pechhuak a. Sum la banga vbc 59.56 hi PHE department hnenah thal 1 atanga thla 12 inkarah a pechhuak nia sawiin sum a hren khawtlai vanga a chawi tur vbc 1.82 chu NRDWP account-ah hian dahluh a ni lo niin a tarlang.
CAG report chuan NRDWP-in ruahmanna a siam te chu zawm a ni lo tih a tarlang a, he scheme hnuaia sum vbc 6.42 hmanna chu a rinhlelhawm hle niin a tarlang bawk.
CAG report chuan NRDWP guidline ang chuan kum 2017 ah chuan thingtlanga khawsa mi nuai 5.23 te ni tin tui thianghlim litre 55 pek tur anih laiin nuai 1.08 chauh pek a ni a, hei hi a pumpui atanga chhutin 21% chauh pek anih bakah sawrkar school leh anganwadi te chu tui in tur thianghlim pek an nih dan tarlan a ni lo niin a sawi a.
Kum 2012-2017 inkar chhung hian state laboratory chuan tum 7261 tui a thianghlim leh thianghlim loh enfiah (test) tur an nih laiin tum 3506 chauh an test a, an test tur zat an tlinlohna hi 52% niin a tarlang.
CAG report chuan Champhai district chhunga tui tihthianghlimna hmun 8 siamna atan nuai 60 hman a ni ti mah se heng hmunte hian a tak takin hna an thawk lo niin a tarlang bawk a. Labour hlawh atana nuai 30.45 hmannate chu a rinhlelhawm hle niin a tarlang bawk.