Aizawl June 19, 2022 : ZPM Legislature Party chuan nimina thuchhuah an siamah National Highway Infrastructure Development Corporation Limited (NHIDCL) in Mizoram hmun hrang hranga hna a thawh naah mipuite leh environment tan harsatna a thlen nasa hle an tiin, NHIDCL kawng siam mek hi kan sawrkarin a vilpui uluk loh avangin kan ram tui hna, lui tui, nungcha, thing leh mauin an tuar nasa a; chenna in chan hial pawh kan awm an ti. Pawl hrang hrangin an duh lohzia an auchhuahpui mek laia, Mizoram sawrkarin ngawih a chuh tlat mai hi hriatthiam harsa an tih thu an tarlang.

ZPM chuan, "Ram hmasawnna hi a hlu a, chutihrualin hmasawnna hnathawhte chuan ram chhunga cheng mihring, nungcha, thing leh mau te tana harsatna a siam em, ram leh hnam himna ti derthawng thei a ni em, tih ngaihtuah hmasak fo a tul a ni. Chutiangin, kawng laihna leivung paih pawh hi uluk a tul tulh tulh dawn a, environment a tih chhiat theih zia te, mihring leh nungcha, thing leh mau ten an tawrh nasat theih zia te hrereng chunga sawrkarin a enpui a; kan rama hmasawnna hnathawhin kan ram leilung a tihchhiat loh dan tur nasa zawkin ngaihtuahna sen a tul takzet tawh a ni," an ti. 

Mizoram sawrkarin July 29, 2020 khan NHAI, NHIDCL, NRRA, BRO, NABARD leh central sawrkar agency dangten Mizorama kawng an laih endik / vilzui turin Roads and Infrastructure Development Board a din a, Chairman chu CM niin member 13 an awm a. Mizoram-in tuna hun harsa a tawn mekah hian, sum tam tak senga din, he Board hian a tihtur dik tak tiin, kawng siam avanga ram mipuite, leilung, thing leh mau leh nungchate bakah feh kawng, dil leh mi tam tak eizawnna atana harsatna nasa tak a thlen mek lai hian, awmze nei leh chak zawka hmala nghal turin ZPM Legislature party chuan sawrkar kan phut an ti bawk.