Aizawl: MPCC Media chairman Lalremruata Renthlei chuan, "Mizoram sawrkar cabinet meeting in tunhnaia school grant in aid pe tura an tih Zasai Memorial HS, Siaha hi school awm tawh lo a ni," a ti.

Vawiina Aizawl Press Club-a press mite a kawmna ah MPCC Media chairman Lalremruata Renthlei chuan, "Chief Minister hova Council of Minister thukhawm chuan School 180 te chu provincialised in, Lumpsum grant-in-aid a awm mek school 52 te chu tunhmaa la awm ngai lo provisional adhoc grant-in-aid ah a hlangkai bawk a. Mizoram sawrkar cabinet meuhin Grant in aid pe tura an tih Zasai Memorial HS, Siaha hi school awm tawh lo a ni a, defunct schoool a ni a. He school hi Siaha MNF MLA candidate tur Lalmalsawma Zasai pa hriat reng nana school din a nia, kum tam kal tawha tihtawp a ni a, a building apartments  te pawh mimalin khaw-sak nan an luah deuh vek tawh a ni," a ti.

MPCC Media chairman chuan Mizoram chhungah mimal, khawtlang leh Kohhran school  tamtakin sawrkar tanpuina an dawn  ve theih loh laia Siaha MNF MLA Candidate tur  Lalmalsawma Zasai te chhungkaw school Zasai Memorial HS school awm tawh lo MNF sawrkar tanpui dawng tur an han ti mai hi Zoram mipuite mak tih a tling a ni, a ti bawk.