Aizawl July 10, 2023 : Vawiin khan ZPM chhung inkhawm neih a ni a, he huna thusawitu C. Lalsawivunga, Aizawl South I bialtu MLA chuan, “Party dang neih ve loh leader kan nei a, a kaihhruaina hnuaiah ZPM hian Pathian leh mipui zarah sawrkarna a chang a nih chuan kuthnathawktute thawhrimna leh thawhhahna ten awmzia a nei tawh ang,” a ti.

C. Lalsawivunga chuan, “ZPM party hian party dangin an neih ve loh leader kan nei a, state kan nih hnuah kum 36 chuang min lo kaihhruai tawhtute hian kan ram min thlenpui chin hi kan hria a. Pathian thu ang taka ram rorelna min kalpui ngam tur, dikna leh rinawmna nena he ram min hruaitu tur leader kan nei hi a lawmawm takzet a, party dang neih ve loh thil hlu kan neih hi kan chhuang takzet a ni,” a ti.

Aizawl South I bialtu chuan, “ZPM party hian Pathian leh mipui zarah sawrkarna a chang a nih chuan a policy hi tihhlawhtlin ngei ngei tumin hma a la dawn a, kut hnathawk mi beiseina nena min thlir mektute hnena ka chah duh chu, in beiseina tihlawhtling turin, in thawhrimna a taka in tel theihna turin ZPM hian hma kan la dawn a ni. Kan thawhrimna leh kan thawhhahna ten awmzia a neih theihna turin ZPM-ah lo lut zel turin ka sawm che u a ni,” a ti.

“Eng kawngahmah intodelh lova kan awm mekna sala ta hi chhuak ila, Pathianin leilung hausakna min pek te a taka haichhuak a, intodelna lamtluang huaisen taka zawh turin kan ngaihtuahna i siam thar ang u. He ram hian Chief Minister tha, Pathian tih mi neih hi kan phu a, Chief Minister tha lo hnuaiah chuan mi thiam tak tak pawh engmah ti thei lovin an thu thuap mek a ni. Retheih huama kan ram tana beitu ZPM Leader Pu Lalduhoma hruaina hnuaiah rorelna tha tundinin a awm ngei ang tih hi ka ring a, Zoram mipui zawng zawng pawh rorelna tha tungdingtu ni turin ka sawm che u a ni,” a ti bawk.