Kar kaltaa Durtlang-a saza ke nia hriat chhar chungchang chu Police ten an chhuichiang mek a, saza ke nia sawi hi AH&Vety mi thiamte endiktir niin an report azirin case ziahluh tum a ni. Saza ke hi Forest thawkte chuan an enfiah nghal a, saza ke ngei nia an hriat avangin Bawngkawn Police station-ah FIR an thehlut a. Police te chuan Vety Doctor te enfiah turin an thawn a, mihring thah nge ramsa dang vang tih hriatfiah a nih hnuah a tul angin case an la ziaklut dawn niin Zalen palai an hrilh. Thudawnna dang chuan saza hram hi hriattur a la awm avangin tuna saza ke an chhar hi chu Durtlang khama khawsa hi ni lovin hmun danga mi a nih a rinawm zawk a ti a. Hetih lai hian Durtlang Leitan YMA hruaitute chuan Zalen zawhna chhangin, “Durtlang khamah hian saza hi 1 aia tam a awm a; chuvangin, 1 hi kuthlei deuhten an lo kap a ni mai awm mang e tiin kan zeldin a; mahse, engmah hriatchianna emaw a kap tu emaw hriat leh rin kan nei chuang lo a ni,” tiin an sawi a ni.