April 27, 2022; Vawiin chawhnu dar 3:30 khan Pu LP. Lalchangkima, Regional Manager chuan State Bank of India (SBI) in a pek, Aizawl Traffic police te lukhum leina tur Rs. 1,00,000 chu Traffic SP Rodingliana Chawngthu kutah a hlan.

Thilpek inhlanna hun Traffic SP office a neih ah Pu LP. Lalchangkima chuan, Traffic police te hnathawh fakawm a tih thu sawiin, SBI hnathawkte hriatthiamna sang nei a an dawnsawn thinna ah leh a tul dan ang a escort an pek thinna ah lawmthu a sawi. Kum kalta lamah SBI chuan, Corporate Social Responsibility (CSR) fund atangin Covid hripui dona atan Health department ah cheng vaibelchhe 2 hu vel bungraw hrang hrang a lo pe tawh tih sawiin, Traffic police te hak tur jacket leina atan cheng nuai 3 an lo thawh tawh thu a sawi bawk.

Traffic police aiawh a thlipek dawngtu Aizawl SP Rodingliana Chawngthu pawhin tun dinhmuna an mamawh tak mai lukhum leina tur SBI atanga an dawng chu lawmawm a tih thu sawiin, lukhum 400 an chah nghal tur thu a sawi a, pawisa hman bang a awm a nih chuanTraffic police in charity box an siamah an dah tur thu a sawi.

Traffic SP chuan tun hma lam a an naute lukhum khum thin chu Bangladesh atanga chawkluh Rs. 100 man a ni tih sawiin, tunah erawh chuan Delhi atanga an chawkluh quality tha zawk, anni lamin tha an tih dan anga an lo siam danglam hret thin a nih tawh thu a sawi.

Thilpek inhlanna hunah hian SBI official thenkhatte bakah Traffic Addl. SP. C. Vanlalvena leh officer dangte an tel.