ZALEN June 28, 2024; Court in SBI Mission Veng Branch, Aizawl a Branch Manager hlui Lalkhomang Guite leh a thurualpui Gary T. Haokip te thiamloh a chan tir, lungin-a khung nghal turin thupek siam.

Thubuai leh Court thuremna kimchang :

He thubuai hi November, 2006 leh October, 2007 chhungin chutih hunlaia State Bank of India, Mission Veng Branch, Aizawl a Branch Manager ni thin Pu Lalkhomang Guite leh a thurualpui Sacred Heart Society neitu Pu Gary T. Haokip te, Mizoram Rural Development Society, Aizawl a Chairman Pu K. Lalremtluanga te, Sacred Heart Society a thawk Pi Rosangkimi Ralte te leh Upliftment of Backward Women Self Help Group-a Chairman Pi Thantluangi te chu Self Help Group hrang hrang hminga loan pekchhuah leh chuta tanga sumpai lo eiru a puhna a ni a.

CBI te hnuchhuina a tarlan anih dan chuan, Pu Lalkhomang Guite leh a thurualpui Pu Gary T. Haokip leh Pi Rosangkimi Ralte te hian Self Help Group lem pahnih (1) Nightingale Self Help Group leh (2) Ramdin Self Help Group te chu phuah chawpin, he SHG pahnih te hming hian loan hi cheng nuai nga (Rs. 5 lakhs) ve ve pechhuak in, chu pawisa chu ti chingpen zuia puh an ni a.

Tin, Pu Lalkhomang Guite leh a thurualpui Pu Gary T. Haokip te hian heng SHG 11 te (i) Gilgal Self Help Group (ii) Ropuiliani Self Help Group (iii) Bazar Self Help Group-1 (iv) Beiseina Self Help Group (v) Zanpar Self Help Group (vi) Nazareth Self Help Group (vii) Kumtluang Self Help Group (viii) Hawilopar Self Help Group (ix) Ainawn Self Help Group (x) Bhakta Self Help Group leh (xi) Ideal Mother Self Help Group hming hian loan hi cheng nuai nga (Rs. 5 lakhs) theuh pe chhuak in, hetiang SHG te hian cheng singnga chauh te, athenin cheng nuaikhat chauh te an dawng lawi si a, a bak chu ti ching pen in, KVIC hnuaia Margin money pawh an tih chingpen sak leh bawk ni a chhuichhuah a ni.

Pu Lalkhomang Guite leh a thurualpui Pu Gary T. Haokip leh Pi Thantluangi te hian ‘Upliftment of Backward Women Self Help Group’ hmingin loan hi cheng nuai nga (Rs. 5 lakhs) pe chhuak in, heta tang hian cheng nuai khat chauh hi he SHG hian an dawng lawi si a, a bak cheng nuai li zet hi ti chingpen a chhuichhuah a ni bawk.

Pu Lalkhomang Guite leh a thurualpui Pu Gary T. Haokip leh Pu K. Lalremtluanga te hian SHG pathum (i) Greenhill Self Help Group te (ii) Zoawi Self Help Group te leh (iii) Mualmam Self Help Group te hming hian loan cheng nuai nga theuh pe chhuak in hetiang SHG te hian cheng nuai hnih theuh chauh an dawng thung si a chhuichhuah a ni bawk.

Court-a thubuai ngaihtuahna ah hian CBI te hian thuhretu mi 50 zet hmangin thubuai an kalpui a, Court thutlukna ah chuan-

1. CBI te hian court-ah hian Pi Thangtluangi leh Pu K. Lalremtluanga te thiamlohna hi an finfiah zo lo tih a ni a.

2. Pu Lalkhomang Guite leh a thurualpui Pu Gary T. Haokip te erawh hi chu puh an nihna ang ngei hian CBI te hian finfiah zo in thiamloh chan tir an ni.

3. Chutih laiin, Pi Rosangkimi Ralte erawh hi chu Court-a an thubuai ngaihtuah a nih lai dt. 3/4/2018 khan a lo boral tak avangin a thubuai hi ngaihtuah zui theih a ni lo thung.

Tichuan, Pu Lalkhomang Guite leh a thurualpui Pu Gary T. Haokip te hi section 120-B r/w 420, 468, 471 IPC leh section 13 (2) r/w 13 (1)(d) of the P.C. Act, 1988 angin thiamloh chan tir an ni a, vawiin hian lungin-a dah luh nghal tura thupek siam a ni bawk.