Aizawl April 27, 2022: Mizo Students’ Union (MSU) General Headquarters, Aizâwl chuan Mizoram Rural Bank (MRB) hnuaia hnathawkte chungchanga hma a lakna kal zelah thil fel lote siam that a nih theih nana thuneitute an ngenna angin  SCERT chuan Local Language Proficiency Test (LPT) result November 23, 2021-a tihchhuah chu a cancel tih an thuchhuah-ah an tarlang.

MSU chuan thuchhuah siamin MRB guidelines leh RRB dan anga hun tiam chhunga Certificate nei lote chu a um zui zel a. SCERT buatsaih exam result chhuakah thil fel lo awm ni-a rinna chu bawhzui a ni a, ni 18.04.2022 khan thuneitute biak niin chhui zui nghal a ni a. Report-a a lan danin LPT nei tur mi 28 zinga 8 chu thla hnih chauh la service an ni chungin MRB Chairman chuan Proficiency Test hmachhawn tur hian list-ah a khung tel a ni. Hei hi RR note 2(1) bawh chhiatna a ni a, chuti chungin LPT hmachhawntu te hi an pass vek a ni. 

MSU chuan hei hi ringhlelin a um zui nghal a, an zinga 4 phei chu MSU-in an thawhna hmun ngeiah interview lain tawng thiam lo an ni tih an fiah a ni a, hei vang hian an test result pawh cancel a ni. Hetianga thil fel lo a awm avang hian SCERT chuan April 22, 2022 khan ni 23.11.2021-a result puan tawh chu cancel a nih thu an chhuah a ni.

MSU chuan ni 18.11.2021-a Language Proficiency Test buatsaihah hian thil dik lo ti duh an awm ngeiin a ngai a, uluk takin chhui zel an tum thu an thuchhuakah an tarlang.