ZALEN, Mar. 09, 2026: Mizorama cricket khelmual awm chhun, Suaka Cricket Ground (SCG)-a pitch tha tawk tawh lo siam that nan state pawn atanga lei ton 36 chaha siam tura hma lak mek a ni.

Cricket Association of Mizoram (CAM) chuan SCG laia ball vawm leh vuakna lai, inkhelhna bawr bik (pitch) chuan duhthu a sam tawk tawh loh avangin chul mal that (pitch top layer resurface)-na turin Guwahati, Assam atangin hetiang atana an hman thin bik lei (pitch soil) an chah lut a ni.

Pitch soil hi bag 1,000 (ton 36) chah thlen tawh a ni a, ruah tui tlak hma, khelmual awl huna hmalak tan tumin ruahmanna an siam.

Sihhmuia SCG hi a hmun petu, Lal Rotluanga pa hming chawiin a hming hi puttir a ni a. Kum 2010 khan a sakna tur lung phum niin DoNER ministry atanga Rs Vbc 11 hmuh hmanga bul tan a ni a, inkhelh theihna peih a nih hnuah May 23, 2014 khan CAM kutah hlan a ni a, tun thlengin a tihchangtlun hna hi thawh reng a la ni.

Tanhrilah pawh khelmual

CAM hian Tanhrilah pawh cricket ground siam turah hma an la tan bawk a. Apex Council-in a hmuna an enfiah hnuah ram chhengchhe lo lai chin vah fai tawh a ni a, meikawng sial zawh a nih hunah sorkar thuchhuak angin March 15 hmain hal tum a ni.

Hal zawh hian contour survey neih leh tur a ni a, hemi zawh hian a tihzawl hna kalpui tan an tum.

Tanhrila ram hi an president lo ni reng tawh, Lalrochuanga Pachuau chhungkaw pek a ni a. He hmun bakah hian Lungleiah Biakchhinga (L) faten ram an lo pe tawh bawk a, hei pawh hi remchang hmasa berah Apex Council-in an en ang.