Aizawl July 29, 2023 : Tukin khan School Education Minister Lalchhandama Ralte chuan Mizoram tan PM eVIDYA DTH TV Channel pahnih a hawng. India ram pum tana Education puala Ministry of Education, Government of India in a duan TV channel 200 chuang chu a rualin vawiin hian hawn a ni.

Heng TV channel te hi India ram puma zirlaiten zirna inang leh intluktlang an dawn theihna tura ruahman niin, One Class One TV channel tih thupui hmanga duan a ni.

Mizoram hian TV channel 2 kan nei dawn a, chungte chu –
1. Elementary level tan Zirna Kailawn- Learning Ladder
2. Secondary level tan Zirna Lamtluang- Learning Pathway te a ni dawn a ni.

Heng channel te hi DTH TV kaltlangin PM eVIDYA MZ128 leh PM eVIDYA MZ129 ah te bakah YouTube lamah SCERT Mizoram Zirna Kailawn- Learning Ladder  leh SCERT Mizoram Zirna Lamtluang- Learning Pathway-ah te live stream a ni thin dawn a, englai pawha en reng theih tura chhawp chhuah a ni ang. Heng TV channel enkawl hi State Council of Educational Research and Training (SCERT) kutah a awm a, State Coordinating Agency atana ruat a ni. A chhuah tur content buatsaih pawh an kutah a awm ang.