Aizawl January 25, 2024 : SCERT buatsaihin vawiin chawhnu khan Incentive Cash Award for Proficiency in Science and Mathematics semna neih a ni a. School Education Minister Dr. Vanlalthlana chu he hunah hian khuallian a ni. HSLC leh HSSLC a Science leh Mathematics subject a top-3 te hnenah lawmpuina sumfai leh memento hlan an ni a.

Khuallian Minister Dr. Vanlalthlana chuan zirlaite chu an hlawhtlinna ah a lawmpuina thu sawiin, an kal zelna turah taimakna thlah lo tur leh an thiamna ramin a mamawh tih hre reng turin a chah a. Zirlaite tiphur tura tum 46 lai mai Cash Incentive Award pek a ni ta chu lawmawm a ti a. Dr. Vanlalthlana chuan Zirlaite chu an zirna leh an hma hunah hlawhtlin tak tak an duh chuan danglam ngam turin a chah bawk. Khawtlang leh kohhran ah inhman dan tur chin tawk hriatthiam a pawimawh thu sawi bawkin, infiamna leh tui dang neih pawh a tha a, mahse mahni tum ah chiang in, chin tawk neih thiam a pawimawh a ti..

Vawiin programme-ah hian HSLC-ah Science subject a zirlai 38 leh Mathematics-ah zirlai 25 ten award hlan a ni a. HSSLC-ah Mathematics, Physics, Chemistry leh Biology a ti tha zirlai 18 ten he cash award hi an dawng bawk.