Aizawl : Basic course for Scoutmasters & Guide Captains chu November ni 14 atanga ni 18, 2022 chhung State Training Centre, Tanhril ah neih a ni a, Zirtawpni khan K. Lalrohlua, State Chief Commissioner, Mizoram Bharat Scouts & Guides & Director, Sports & Youth Services chuan kharna hun a hmanpui.

Training hi Youth Welfare Officer Lalngilneia Colney, Sports & Youth Services & State Secretary, Mizoram Bharat Scouts & Guides ni bawk kaihhruaina hnuaia neih a ni a. Training-ah hian High School leh Middle School zirtirtu mi 62 District hrang hrang an tel a ni.

Guide Captains bik hi Lalnunsiami Pachuau, State Organiser (S&G) SYS in a kaihruai a, Lalngilneia Colney in Scoutmasters hi a kaihruai bawk. Zirtirtute training an nih angin School-ah Scouts & Guides tha tak din turin leh Zirlaite hmangaih taka enkawl turin leh Scouts & Guides thupui ber, khua leh tui tha ni tura zirlaite buatsaih zel turin State Chief Commissioner chuan a chah a. Scouts & Guides movement hi Pathian thu laimu, innghahna tlak a nih zia a sawi bawk.