Kumin nipui transfer-ah hian player langsar tak tak mahni contract hmang zo a thlawna lakluh theih an awm nual a, chung zingah chuan Paul Pogba, Paulo Dybala, Antonio Rudiger, Andreas Christensen, Christian Eriksen leh Alexandre Lacazette te pawh an tel a, an ni paruk hi chuan free transfer-in club thar an zawm fel leh tawh a, anni bakah hian player kan hriat lar leh langsar tak tak, club khelhna tur la nei chiah lo an awm nual bawk. Chung zingah chuan langsar zual mi pali an awm a, chung mite chu  tute nge an nih kan en ho dawn a ni. 

Player lar leh langsar tun thlenga club khelhna tur nei lo mi pali te chu:

#4 Aaron Ramsey
Aaron Ramsey leh Juventus te inremna chu July ni 26 khan a tawp tawh a, mahse tun thlengin club khelhna tur mumal a la nei thei lo. Welsh pachal hian 2019 nipui lai khan Bianconeri hi a zawm a, mahse Turin lamah hian Ramsey-a beisei angin thil a kal lo. Season thum chhung teh meuh Juventus lama a cham chhung khan game 70-ah chiah a inlan thei a ni.

Ramsey hian 2021-22 season khan Rangers lamah loan hmangin a chhuak a, game 13 a khelhah goal hnih a thun thei. Ramsey hian a thiam ala theihnghilh lo tih a hriat. Kum 31 mi hian 2022 FIFA World Cup-a an ram tana inlan a duh ve dawn chuan regular taka khelhna tur club a zawn hmuh thuai a ngai dawn a ni. 

#3 Andrea Belotti
Torino striker hlui Andrea Belotti hi tlem lai deuh kha chuan Europe-a striker naupang duhawm ber pakhat a ni. Mahse, ani pawh hian beisei a phak lo va, Belotti hian 2016-17 season khan Serie A game 35 a khelhah goal 26 a thun a ni. 2019-20 season khan ropui takin a inlan leh a, mahse Belotti hian hliam vangin buaina a tawk chho zauh zauh a, season liam ta pawh khan Torino tan Serie A matche 22-ah chiah inlanin goal riat chauh a thun bawk. 

A hliam chung pawhin Torino lam hian an tana khel turin an la duh a, club president Urbano Cairo pawhin contract duhawm tak a zawrh leh chungin inremna an la nei thei rih lo. La Gazzetta dello Sport lam tarlan danin Belotti leh AS Roma chuan inbiakna an nei mek niawm tak a ni. 

#2 Edinson Cavani
2020 khan Edinson Cavani chuan transfer tawp dawn zanah Manchester United chu free agent-in a zawm a, boruak pawh a nei hat a nih kha. Uruguayan international hian beisei ang chuan kel tha tawk lo mah se a khel chhe hran lo va, 2020-21 season khan vawi tam Red Devils hi a chakpui thung.

Kum 34 mi ni tawh mahse Uruguayan striker hi player hlauhawm tak a la ni a, 2020-2021 season khan match 38 a khel a, a tam zawk chu bench atanga lut a ni nghe nghe, chuti chungin Cavani hian goal 17 zet khungin assist paruk a nei thei a ni. United nen inzawmna tha an neih chhoh mek laiin Manchester United chuan Cristiano Ronaldo an lalut thut a, Portuguese forward chuan Uruguayan international chu a nek chhuak titih ta a ni.  

Hliam a nei neuh neuh a, season liam ta Premier League-ah pawh khan game 7 chiah a start phak a, tunah hian Borussia Dortmund lamin an rim mek a nih hmel. 

#1 Isco
Kum 10 vel liam ta khan Isco hi khawvel central midfielder tha ber pakhat a ni thin a, a chet ran leh passing dik lutuk bakah hmun chep takah pawh tha taka a tal chhuak thiam khan mi mit a la hle thin a ni. 

Spaniard Isco hian a khelhna club lamah buaina a tawk chho zauh zauh a, 2010 bawr chho vela player duhawm ber pakhat kha 2020-21 leh 2021-22 season-ah meuh chuan alo hniam ta hle a, La Liga game 11 chiah a start phak a ni. 

Real Madrid nen an inzawmna thuthlung chu tun nipui khan a tawp a, contract pawtsei lovin tunah chuan club nei lovin a awm rih. Tunah hian Sevilla, Real Betis leh AS Roma te chuan Isco hi an ngaihven mek a, club thar a neih thuai a rinawm.