Aizawl January 29, 2024: Vawiin khan ZPM chuan Party Office-ah chhung inkhawm hun hmangin thusawitu K.Sapdanga, Working President leh Home Minister ni bawk chuan, “Chief Minister-in sawrkarna kan siam tirhah ni 100 chhunga thawh tur a puang a, bul tan nghalin inrenchem kan thupui a, second 1 chhungin cheng nuai 400 kan hlep nghal. Ni 100 chhunga tih tur kan ruahmante kan tihlawhtling mek,” a ti.

ZPM Working President chuan, “Inrenchem tur kan ti a, ni khat ni atangin tan nghal a ni. MLA tharten Motor a thlawna cheng nuai 10 an dawn theih chu tihtawp a ni a, second 1 chhungin cheng nuai 400 kan hlep nghal ringawt mai a, Chief Minister tiamin Minister-ten Car pakhat leh support car pakhat chauh kan kawl ta a ni. Chief Minister leh Minister zin inzui vak vakte tihtlem tumin a hautak lo zawnga hmalak a ni a, chutihlaiin loh theih loh chin a awm ve a, kan hriat thiam a ngai. Zirlai ten Minister hmuah khap a ni a, inzawn khap a ni bawk," a ti.

Home Minsiter chuan, "Minister leh MLA-ten thawktu leh an dawn theih tam tak a zat ve a tihhniam a ni a, Office leh Bangla bungraw thar lei rih loh a ni a, sawrkar kum thar tur Year of Consolidation-ah puan a ni. Kum hlui November leh December sawrkar hnathawk hlawhte thlatirah pek an ni a, SEDP sem bang Rs.150 crore atangin Rs.120 crore chu thlai thar lei nan dah nghal a ni a, sawrkar sum mimal account-a dah lo inchingfel turin ngen an ni. Resource Mobilisation Department-te thiah nghal an ni bawk a. Entitlement theuhah lungawi tura ngen an ni a, Minister-in hma kan hruai a, min zui turin Official-te kan cho a, sawrkar hnathawk aikal lak chungchangah chak taka hmalak nghal a ni bawk,” a ti.

K.Sapdanga chuan, “Sawrkar hmasaa Work Order nei, hna tan tawhte chu chhuhsak kan tum lova, hna quality lamah erawh kan fet hle dawn a, hna la tan lo erawh stay nghal tur a ni. Hmachhawp leh tihfel tur a la awm nual a, Monitoring Committee kan din a, Recognise Party tin aiawh, Kohhran aiawh leh NGO aiawhte an tel dawn a. Zoram mipuite hlemhletna do turin kan sawm a, State Marketing Board kan din ang a, thlaithar lei hna an thawk chho dawn a ni. Boundary Committee din tur a ni a, na takin ruih theih thil dona kalpui nghal a ni bawk. Car leh man power Entitlement Service Rules leh Manual-in a sawite zawm vek turin kan inphut a, Police Department-ah chuan February thla chhunga inchinfel kan tum a, kan hnung zui turin department tinte kan sawm a ni,” a ti bawk.