Secretary level-a inbiakna duh khawp lo ; NHM thawktu ten ni 3 leave lak tum

Admin - Jul 11, 2021

Ministry level atang lo chuan chinfel theih loh thil tam tak a awm, an ti

Aizawl : National Health Mission Employee Union, Mizoram (NEUM) chuan ni sawm chhung zet Mizoram sawrkar hun an pek hnuah an duhdana inbiakna kalpui a nih loh avangin casual leave ni thum chhung lak an tum. Ministry level-a inbiakna neih an beisei laia Secretary level bak an thleng thei lo chu an hrethiam lo bawk.

NEUM  te chuan, NHM lama an hotu ten theihtawp chhuahpui thin mah se, sawrkar lam hotu lam ten an ngaihtuah tawk lo nia an ngaih thu an sawi a, tun hnaia inbiakna an neihah pawh secretary level-a inbiakna bak an neih theih loh thu ZALEN an hrilh. Secretary level-a inbiakna an neih chu hlu viau mah se, an dinhmun ngaihtuahin ministry level atang lo chuan chinfel theih loh thil tam tak a awm thu an sawi.

Tunhnaia an inbiaknaah hian COVID-19 hri an kai avanga in enkawlna senso anmahni an lo pek tir tawh mi pariat te pawh an sum chawi an re-imbursed sak nghal tih an sawi a, hun lo kal zel turah NHM thawktute chu free treatment an tih sak tur thu pawh hrilh an ni a, an hlawh tang pawh tifel thuai turin hma pawh an lo lak sak nghal  a ni tih NEUM president Malsawmtluanga Hauhnar chuan ZALEN a hrilh. Chutihrualin an thil phut engemaw zat tihhlawhtlin sak tura hmalakna a awm loh avangin a ruala chawlh lak (mass casual leave) hi an tum ta tho a ni.

Malsawmtluanga Hauhnar hian, “A ruala chawlh kan lak chuan damlo enkawlna, sample collection, sample testing, COVID-19 vaccine pek-ah te chu a khaihlak lo thei dawn lo  a ni. Chutihrualin kan dinhmun hi kan ngaihtuah tel ve loh theih loh avangin mipui hriatthiamna kan ngen a ni,”tiin ZALEN a hrilh.

NEUM lam hian July 2020 ah khan Health & Family Welfare Department hnuaiah regular post ruak a awmin NHM hnuaia thawktu te hi MoHFW, GOI duhdan anga a ngheta luh theih dan tur ruahmanna an thlen tawh tih an thuchhuakah hian an tarlang a, H&FW hnuaia regular post ruak a awma 70% dah nghet tura an lo sawiho tawh chu tihhlawhtlin ngei an phut thu leh Health department hnuaiah hian post 700 chuang hnawhkhah loh a awm thu an tarlang. 

Kum 15 thawk tawh te Special Scheme siamsak ni se ti a kum 2019 a thu dah pawh tun thlenga hmalakna leh hmasawnna awm lo nia sawiin, Central sawr-karin kum 2011 a thuchhuah a lo neih tawh state sawrkarin plan felfai tak siama kum 5 thawk tawh chin regularise tura a tih pawh hi kan state tan a harsat an rin thu leh kum 10 thawk tawh chin tal hi chu state sorkarin min regularise/ absorb ngei turin an phut tih an tarlang bawk. Tunah hian kum 15 thawk tling tawh mi 56 an awm thu leh kum 20 chuang thawk pawh an awm tih ZALEN an hrilh.

National Health Mission (NHM) Mizoram hnuaiah hian hna hrang hrang thawktu; Doctor, Nurse, Health Worker, Laboratory Technician, Pharmacist, X-Ray Technician, Opthalmic Asst., Driver, Office staff, etc. an zavaiin mi 2175 an awm mek a ni.

Share now