Aizawl: Socio-Economic Development Policy (SEDP) sum hmanga zirtirtu 500 lak tawh bakah indaihlohna phuhruk nan zirtirtu dang 100 chuang lak leh tum a ni.

ZALEN in Human Resource Development Board vice chairman L.Thangmawia hnen atanga thu a dawn danin SEDP sum hmanga zirtirtu lak te chuan an hna an zawm vek tawh a. Mahse zirtirtu pension te, kaisang leh engemaw harsatna tawk an awm avangin harsatna zualpui phuhruk nan SEDP sum hmangin zirtirtu 100 chuang lak leh tum a ni tih a sawi a. "Kan tum anga zirtirtu hi kan lakbelh thei anih chuan zirtirtu indaihlohna zualpui chu a sutkian kan beisei a, a zavaia indaihlohna chu hnawhkhah theih a ni lo a ni," a ti.

L.Thangmawia chuan zirtirtu chu a tha leh tling ber zel lak an tum niin a sawi bawk. SEDP hnuaia zirtirtu hi Primary school ah Rs. 10,000, Middle school ah Rs. 13,000, High school ah Rs. 15,000 leh Higher Secondary school ah Rs. 20,000 te hlawh tir an ni.