Aizawl March 22, 2022 : Vawiin khan Zoram People Movement Party Thalai chuan Aizawl Press Club-ah Chanchinthar lakhawmtu te an hmachhawn a, East Lungdar Group MNF ten zirtirtu post 2 leh LDC post pakhat chu SEDP hnuaia zirtirtu hna thawk turin an thlang, an ti.

ZPM Thalai chuan East Lungdar Group MNF Secretary hminga Advertisement chhuah a ni an ti a, 18.3.2022 zan khan Group MNF te hian an thlang zui ta niin an sawi. ZPM chuan hetianga sawrkar hna lak tura rulling party unit leh group te an inrawlh chu an hriatthiam loh thu an sawi a, MNF sawrkarah dan rorelna leh dikna in hmun a chan tawh loh zia a tilang chiang hle, an ti.

MNF East Lungdar Group-in Zirtirtu an thlan te hi primary school pahnih tan pakhat ve ve an ni tiin LDC hi High School atana lak an nih thu an sawi bawk. ZPM Thalai chuan SEDP chu mipui sum, mipuite ta liau liau a nih laia party fund ang maia sum hman a ni chu tha an tih loh thu an sawi a, mipuite zah lohna lian takah an ngaih thu leh pawi an ti thu an sawi.