Aizawl January 21, 2024 : Mizoram sawrkar chuan Socio Economic Development Programme (SEDP) hnuaiah zirtirtu 1,143 a chhawr mek a. Heng zirtirtute hi bân an nih chuan zirtirtu indaih lohnain nghawng a neih ngei a rinawm.

ZALEN RTI zawhna chhangin School Education SPIO chuan SEDP hnuaia zirtirtu rawih zat hi a ngai reng thei lo a, enrolment hnuhnung berah chuan 1,143 an nih thu leh hengte hi DIET lecturer paruk, Govt. HSS 38, Govt. HS 296, Govt. MS 208, Govt. PS 494, LDC 51 leh IV Grade 50 te an ni.

SEDP zirtirtu hlawh atan hian enrolment a danglam thin avangin senso hi a dang lam deuh reng a, thla khatah Rs. 1,38,00,000 ngai tura chhut a ni a. March thla erawh matric exam hun leh chawlhte a nih avangin thla chanve (ni 15) hlawh chauh pek thin an ni a; chuvangin, sum ngai zat (fund requirement) hi Rs. 69,00,000 a ni.

SEDP zirtirtute hlawh hi a inang vek lo a, DIET lecturer-in thla khatah Rs. 25,000, HSS teacher Rs. 20,000, HS teacher Rs. 15,000, MS teacher Rs. 12,500, PS teacher leh LDC Rs. 10,000 ve ve leh IV grade Rs 8,000 te an ni.

SEDP zirtirtute chawlhtir/bân tumna a awm leh awm loh zawhna chhangin SEDP zirtirtute hi sawrkar chuan academic session 2023-2024 March chhung chu thawhtir chhunzawm a phal a, a hnu zel tur chu sawrkar thu thu a nih thu leh SEDP zirtirtu aiawh zirtirtu dang lak tumna a awm leh awm loh department chuan a hre lo niin an sawi.

SEDP zirtirtute hi a tirah chuan HS section atan kum 2021-ah pek tan a ni a, a hnuah zirna in hrang hrangah a tul ang zela chhawr zui an ni.