ZALEN August 15, 2023 : Hnahlan Grape Farming & Processing Cooperative Society Ltd. leh North East Wave (NEW) te tangkawpin August ni 19, 2023 (Inrinni) hian Hnahlan Winery-ah Grape Festival - The Grape Escape an buatsaih dawn a. Festival-ah hian cultural lam leh rimawi lam te pawh tel tura ruahman a ni.

The Grape Escape hi SEDP sum atanga buatsaih tur niin, sorkar laipuia Tourism ministry pawhin a hriatpui leh a thlawp a nih thu a buatsaihtute chuan an sawi a. Grape chin leh tualchhung siam Wine bakah Wine tourism leh Agro tourism te chawilarna tura ruahman a nih thu an sawi.

Hnahlana Grape Festival - The Grape Escape hi Champhai North bialtu MLA Dr ZR Thiamsanga'n hawngin a hmanpui dawn a. Grape chingtu hnathawk tha te chawimawina hlan an ni ang a, marathon te bakah intihhlimna chi hrang hrang pawh buatsaih a nih tur thu a buatsaihtute chuan an sawi bawk.