Aizawl: Mizoram chhimlam Lungzarhtum leh a chhehvela bawng neitute chuan sele vanga an bawnghnute an sawr theihloh avangin sawrkarah zangnadawmna an dil a, mahse sawrkar lam chuan pek theih a ni lo tih an sawi. Zalen palaiin a biakna ah PCCF Rosiama Vanchhawng chuan an dan hman mekah hetianga zangnadawmna inpek theih dan hi a awm lo nia sawiin DC lamah thlen chi ani zawk tih a sawi. Sele in mi a tihbuai leh a hlauhawm avangin hnawhbo dan a awm em tih zawhna chhangin PCCF chuan, “Hmalak a har a, DFO Lawngtlai leh LADC thuneitu ten lo ngaihtuah se kan ti a. A awmna hi Lai Autonomous District Council huamchhung a nih avangin an kuta awm deuh a nih avangin direct taka kan tih a rem lo a. Hmalak dan tur kan ngaihtuah zel ang,” a ti. PCCF Rosiama Vanchhawng chuan Lungzarhtuma sele chu India ram hmun danga sele nen a inang lo niin a sawi a. "Mi thiamten a thlalak an han enchianin sele nen a danglam deuh a. Ramhnuaia hun rei tak lo awm tawh sial a ni thei mai em tiin mi thiam thenkhat chuan an ngai,” a ti bawk. Lungzarhtum a sele hi bawng rual zingah a awm avangin leh khaw chhungah te a rawn luh thin avangin mipui an ralkhel thin hle a. Kawnga kal lirthei pawh tum hnih a bei tawh bawk. Sele hi bawngrual zingah hian awm reng lovin ni 4/5 te a rawl bo a, hemi hnu hian a rawn inlar leh thin niin an sawi.