Zothan Autoworks Pro Volleyball League khelh mekah Hunthar chuan semi-final lut sa chungin an khel a, an elpui kumhlun TNT hmachhawnin 25-22, 25-20, 25-23 (3-0) in hnehna an chang. An khelh tawha an chet ṭhat ber ni hial turin set thum faiin an chak a, league vawi li an khelhah chak fai vekin team panga inel zingah an sang ber.  

 Mi mala point thawk chhuak hnem ber Gagan Kumar chuan D3 Business Player of the Night lawmman a dawn rualin, Huntharin thawh hona leh inpumkhatna ṭha tak an lantir tluan a, Laldensanga leh Lalramnunfela bakah setter Remsangzuala'n hlawk tham takin team an ṭanpui a ni. Vawi thum champion thei tura rin kai ni chungin kar leh thawhlehni zanah league-a palina nen final luh an inchuh ang.

TNT-in semifinal lut turin point hnih neih belh an mamawh a, ṭum dang aia inkhairual zawkin player-ten khel mah se inelna boruak sangah an hriam zo lo va, inhnehtawk tak chungin a bet zawkah an ṭang tluan a, set khat mah an la lo. A hmaa vawi hnih an khelh tawhah langsar fal tak Vanlalṭanchhana'n ṭum dang a pha lo va, Zosangzual leh Sadraka Fanai chuan fel fai takin khel mah se team an chawi kang zo bik lo. TNT-in vawi thum an khelh tawhah a ṭum hnih nan an tlawm a, inrinni zanah Durtlang North hmachhawnin league an khar dawn a, tlang turin hun ṭha an la nei.

D3 Business Player of the Night
- Gagan Kumar (Hunthar)

Amrit Premium Plus Cement Fan of the Night
- Elizabeth Lalrinhlui, TNT

Player stats :

HUNTHAR

Gagan Kumar : point hmuh 25, point hloh 8
Laldensanga : point hmuh 17, point hloh 4
Lalramnunfela : point hmuh 14, point hloh 3
Zomuansanga : point hmuh 5, point hloh 2

TNT
Zosangzuala : point hmuh 14, point hloh 1
Sadraka Fanai : point hmuh 9, point hloh 0
Vanlalṭanchhana : point hmuh 14, point hloh 7
Laldinchhunga : point hmuh 5, point hloh 1
Lalrinzuala Hnamte : point hmuh 4, point hloh 2

FIXTURE :

May 21, Inrinni
8pm : Durtlang North v TNT (mipa)

May 23, Thawhtanni
8pm : Bethlehem Vengthlang v Durtlang (hmeichhia)