Kerala-a Wayanad Lok Sabha bial chu a bialtu, Rahul Gandhi-a Member of Parliament a nihna hlihsak a nih hnuah Zirtawpni atang khan bial ruak a ni ta a, a hmun ruak luah tur thlanna hi September-ah neih tuma ruahmanna kalpui mek a ni.

Gandhi-a hi Gujarat-a Surat court chuan mi tihhmingchhiat thubuaiah Ningani khan kum hnih lung in tang turin a hrem a. Congress hruaitu hi ni 30 chhung bail-a chhuah mek niin court sang zawngah a thubuai hi a thlen leh thei ang.

Representation of the People Act, 2015 Section 151A chuan ‘parliament leh state legislature-a bial ruak a awm chuan a hnawh khat tura bye-election hi a ruah atanga thla ruk chhunga neih tur’ tiin a inziak a ni.

He dan tlawhchhan tho hian Gandhi-a hi MP a nihna atanga hnawl a ni a. He dana Section 8(3) chuan ‘MP tu pawh, dan hmanga thiam loh chantir a niha kum hnih leh a aia tam lung in tang tura hrem apiang chu MP an nihna hnawl (disqualify) tur a ni’ tiin a inziak a ni.

Lok Sabha Secretariat chuan Zirtawpni khan Gandhi-a nihna hnawl a nih thu hi hriattirna a tichhuak ta reng a, tunah chuan a hmun ruak luahtu tur zawnga inthlan tur chu Election Commission kutah a awm ta a ni.

Lok Sabha-ah hian bial vawngtu awm lo pahnih - Jalandhar leh Wayanad a awm ta mek bawk.

Gandhi-a hian kum 2019 ram inthlanpuiah khan a bial him ni reng thin, Amethi, Uttar Pradesh chu a lo chân tawh a, a dinna pakhat zawk, Wayanad-ah erawh a tling a ni.

Thiam loh a channa leh hrem a nihna thubuai hi kum 2019-a Karnataka assembly inthlan dawna Kolar biala an party tana a campaign-naah ‘engati nge rukrute hian hming inang, Modi tih an put zel?’ tiin a sawi a. Gujarat minister hluiin he thu a sawi avang hian Modi tih hmingpute a tihmingchhia nia puhin thubuai a thehlut ta a ni.

A dan hre mi leh Congress party chuan Gandhi-a hian sessions court-in a laka thu a rem dan hi court sang zawkah ngaihtuah leh turin a thlen dawn niin an sawi.

Gandhi-a hian a thubuaia thiam loh a chan hnu leh hrem a nih hnua a vawi khat nan Inrinni chawhnu khan thuthar lakhawmtute a kawm nghe nghe.

Hma hun chiang lo?

India ramah hian nakumah Lok Sabha inthlanpui a awm dawn a, thiam loh a chan tak miau avangin eptuten an chhuanvawr ber, Gandhi-a hian a chuh ve thei dawn em tih a chiang ta lo.

Inthlan chuh tur chuan tuna thiam loh leh hrem a tawhna thubuai hi court sang zawngin a tihkhawtlai emaw, thiam a chantir emaw phawt a ngai dawn.

Dan chuan MP emaw, MLA emaw tu pawh court-in thiam loh a chantirte chu lung in an tan hun a tawp atanga kum ruk chhung inthlan chuh thei lo turin a ti a ni.

Tun hma lamah pawh mipui thlan politician eng emaw zat an nihna atanga hnawl an lo ni tawh thin.

Gandhi-a pi, Indira Gandhi pawh kum 1977 khan prime minister a nih laiin court chuan rei vak lo chhung chu a nihna atanga a lo paih tawh a ni.

Tun hmaa thleng tawh thin ni mah se tun hnaiah, a bikin Prime Minister Narendra Modi-a kaihhruai BJP-in thuneihna an chan hnuah anmahni ep leh sawisel zawnga che langsar mi mal leh pawl pawh sorkar hian dan tlawhchhanin a hrem nasa zual nia ngaih a ni.

Zirtawpnia Gandhi-a MP atanga hnawl a nih hma lawk khan eptu party 14 lai chuan Supreme Court-ah Modi-a sorkarin sorkar laipui hnuaia thil chhui hna thawktu agency-te a hman dan a dik lo tiin petition an thehlut hial a ni.