August 29, 2023; Mim kut thla, September, kohhran ten 'Beihrual thla' tia kan sawi thin ni bawk kan chuang kai dawn a, MNF Sub Hqrs., Lunglei chuan an block leh unit te chu beihrual programme tibuai zawnga programme dang siamlo turin an hriattir.

Beihrual thla hi kohhran hrang hrangah hman dan a inang lo a, Presbyterian kohhran chuan 2023 Nilai leh Beihrual Thupui bu siamin, thla tluaninn 'Mizoram Presbyterian Kohhran Inrelbawl dan' tih Rev. B. Sangthanga ziak an zir ang. Kohhranr pumhuap a biakin a hun hmang an awm ang a, upa bial then anga hun hmang te pawh an awm ang.

Mizoram Baptist Kohhran (BCM) chuan 'Lalpa Lokal Lehna' tih Rev C. Lalrochama ziak an zir ang a, zirlai 10 awmin, chumi bak chu crusade/camping in kohhran ten hun an hmang ang.

Salvation Army chuan hapta tin ah zirlai hrang hrang an zir dawn a, ni 4-8 chhungin outreach service lam hawi an zir ang a, ni 11-15 chhungin social service lam leh ni 18-22 chhungin, mahni inphat (self denial) lam hawi, mi hrang hrang ziah an zir ang. Zirlai ziaktute hi Commr. Lalkiamlova, Maj. Jerry Lalrozama, Capt  Anthony C. Lalruatfela leh Capt. Lalrinmawia (tetea) te an ni.

Kohhran dangte pawhin thupui leh zirlai siamin, beihrual thla hi an hmang dawn bawk a ni.

Kohhrante thla pawimawh bik, Beihrual thla chungchangah hian MNF Sub Hqrs., Lunglei chuan an unit leh block te chu kohhran hrang hrang ten Beihrual thla hlung tak leh hlawhtling taka an hman tlan za theih nan, beihrua programme tibuai zawnga programme dang siamlo turin an hriattir a ni.

Beihrual History tlem : Kum 1918-ah June; 1919 leh 1920-ah September, 1921-ah January, 1922 – 1924-ah April thlaahte hman thin a ni a. Mumal taka September thla a hman hi 1912 atangin a nih hmel (Presby. Oct. 1920, Oct. 1921 No. 33, Asssembly 1925 : January, No. 18).

Standing Committee thurel angin kum 1973 atangin ram pum huap thuzir bik siam tan niin a lang. “Kan Kohhran kumtin Beihrual hi fel zawka kan tih theih nan Beihrual programme ram pum tan siam ila, kan subject chu ‘Insumna’ lam thu nise,” (SC - Dt. 28.8.1973 No. 7). Mizoram buai avangin ram pum huap zir tur siam loh tum a awm a, hengah hian mahni Kohhran remchàn anga buatsaih leh hman a ni.