Aizawl : May 13, 2024 khan Chief Minister Conference Hall ah Chief Minister Lalduhoma hovin Health Deptt. hotu te, Serchhip JAC hruaitute leh Serchhip ZPM Block hruaituten Serchhip Dist. Hospital sakdan tur Blue Print an thlir hova, a satu tur Zamzo Consultancy Firm ten Power Point Presentation an pe a, hrilhfiah ngai te an inhrilhfiah a ni.

Serchhip Disttrict Hospital hi Block 5 a sak tur niin tun dinhmunah chuan chhawng 6 a sang a sak tura ruahman a ni a, mahse nimin meeting ah hian Block 2 chu a chung chhawng khat sak chhunzawm leh tura ruahman nise tih a ni.

Serchhip JAC te ngenna anga Hospital sakna tur hnuai, Ramthlun Road kan an atanga laihzawl a, Public Parking tura ruahmanna Architech in an siam chu a beitham deuhva an hriat avangin Hospital hnuai tur zawng zawng pawh laihbelh a, motor thahnem tak park theihna atan ruahman nise an ti.

Serchhip Dist. Hospital sakna atan hian Power Grid Corporation of India Ltd. CSR Fund atangin Rs.21,00,00,000/- (Cheng Vaibelchhe sawmhnih leh pakhat) hmuh fel a ni tawh a, a la daih bak zawng chu Chief Minister leh Serchhip Bialtu MLA ni bawk Lalduhoma’n ngaihtuahsak a tiam a ni.

Serchhip District in Hospital changtlung leh chhuanawm tak a neih theihna tura Chief Minister Lalduhoma hmalakna leh inhuamna ah Serchhip JAC te chuan lawmthu an sawi tih an tarlang a, Chief Minister duhdan angin he Hospital hi sak puitlin a nih thlengin an vil zui dawn tih Serchhip JAC hruaitute chuan an sawi bawk.