Aizawl:  Covid-19 vanga Mizoram sawrkarin Total Lockdown a puan mekah chak deuh zawk a Dist. Level Task Force (DLTF) Comtt. function tir tawh turin Serchhip Dist. MJA ten DC Kumar Abhishek an ngen. 

Nimin khan Serchhip Dist. MJA te hian Serchhip Press Club ah meeting neiin Serchhip District a Total Lockdown kalpui mek chungchang an thlirhova, Serchhip District chhunga Total Lockdown kalpui a nih dan chu a rual khai lo hle nia hria in hei hi District Level Task Force Committee Function mumal loh vang nia an hriat thu an sawi a, Serchhip khawpui veng hrang hranga Village Level task Force (VLTF) Comtt. te hmalakdan pawh a rualkhailo hle ni a hria in Dist. Level Task Force Commtt. hian VC Area tina VLTF te duty dan tur leh an thuneihna chin mumal takin SOP duansak tul an tih thu an sawi.

Tun dinhmunah hi chuan Serchhip khawpui chhungah ringawt pawh VLTF ten Total Lockdown an kalpui dan hi a rualkhai lo em em mai a, VLTF thenkhatin feh an phal laiin VLTF thenkhatin an phal lova, VLTF thenkhatin mipui nawlpui bazar na tur hmun an siam laiin VLTF thenkhatin hmun bik siam lovin chawhmeh zuar te, an Ina zawrh an phal thung a, dawr hawn chungchangah pawh rualkhai lo tak taka kalpui a tam em em niin Serchhip district MJA te hian an sawi bawk.