Aizawl: Serchhip district chhung khaw pahniha kel hri leng, Peste Des Petits Ruminants (PPR) vangin kel 205 an thi tawh.

Serchhip AH&Vety Department hotute sawi danin tun hnaia Serchhip district chhunga Thinglian leh Lungpho khuaa PPR vanga kel thi hian ziaawm lam a pan tawh a. A lenna hmun, Lungpho khuaah hian kel 56 sem a niin heng zinga 43-te hi hri vang hian an thi a, tunah hian kel 13-te chu an la dam a. Thinglian khuaah kel 92 semin 85-te chu hri vang hian thiin la dam 7 a awm.

Thinglian khua hi kel vulhna khua niin a hmain khawtualah kel 81 a awm a, heng zinga 77-te chu hri vang hian thi bawkin kel palite chu a la dam a. Thinglian bikah hian kel sem leh an vulh sa 173 atangin kel 162 thiin tunah hian 11 a la awm mek a ni.

Tun hnaia Serchhip district chhung Sailulak khuaa sial vulhte chinghnia nia hriatin a beih chungchangah AH&Vety department hotute chuan a theih anga an buaipui thu sawiin, report pawh an lakkhawm thu an sawi a. Amaherawhchu, ramsa kut tuar an nih avangin forest department-ah thlenin anni hian sawrkar hotute hnenah an thlen ve leh thin thu an sawi bawk.

Sailulak khuaa sial vulhtute chuan Zirtawpni thleng khan chinghniain a beih avanga thi nia hriat se ruang 12 an hmuh tawh thu an sawi a, hei aia tam zawk hi hmuh loh an neih an la rin thu an sawi bawk.

Sailuluk khua chuan an se vulhte hi chinghnia laka an him theih nan khalhkhawm hna an thawh mek thu leh a then phei chu km 17 vela hla atanga khalhkhawm an nih thu sawiin, hei vang hian sawrkar (forest) lama report pawh an la buaipui hman loh thu leh nikum lamah erawh tanpuina an hmuh thu an sawi a. An sial beitu chinghnia pakhat thang hmanga an awk nia sawi chu an hriatpui loh thu leh hetiang hi a awm an hriat loh thu an sawi bawk.