October 1, 2024: Rs.Vbc 86 chuang zet senna tura Chief Minister Lalduhoma'n drawing a approved tawh, hna pawh an thawh tan mekna Serchhip Dist. Hospital thar sak hna chu tiam chin awm lovin naktuk 2nd Oct 2024 atang hian Contractor in a chawlhsan rih dawn.

Hemi chungchanga ZALEN thudawn danin Serchhip Dist Hospital sak hna thawk tura thlan Zamzo Construction & Consultancy Firm chuan Hospital sakna atana bultanna tur sum Rs.21 crores petu tur Power Grid Corporation of India Ltd.(PGCIL) te hian Hospital Drawing, CM in a approved tak hi an pawm ve em? tih Health Deptt hotute an zawt thin a. Vawiin thlengin a chhanna an la dawng thei si lova, chuvang chuan hna an thawh thlawn lohnan sum petu tur PGCIL ngaihdan hriat phawt an duh a, an chawl rih dawn nia thudawn a ni a.

 PGCIL in an hnathawh hi official a an pawm hunah an chhunzawm leh dawn nia sawi a ni bawk.

Hetihlai hian Serchhip-ah zan riaka zin mek Chief Minister Pu Lalduhoma chuan vawiin khan Serchhip Dist. Hospital sak hna thawh tan mek chu a tlawh a, Hospital sakna atana Drawing a lo Approved tawh Rs.86 crores chu Rs.71 crores a sak a nih zawk tur thu a sawi leh nia thudawn a ni a.

A drawing te pawh siamthat a, a chhawng awmzat leh Building te pawh tihtet leh a ngai dawn niin a lang a, chumi chungchang chu vawiin tlai dar 3 a Aizawl MINECO a Commissioner & Secretary to CM & GAD Pu Vanlaldina Fanai hova Health Secretary, Secretary Planning & Implementation, PWD E-in-C, Director Health & Medical Education, CE PWD(Building), Chief Architech PWD leh Zamzo Construction & Consultancy aiawh te Meeting ah rel zui nghal nia thudawn a ni bawk.