Aizawl : Congress Legislature Party leader Zodintluanga chuan bial fanga a zinchhuahna Lungsena thu a sawi naah Serchhip bial Bye Election chu thil danglam tak a nih tur thu a sawi.

Thorang bialtu MLA chuan, "Serchhip Bye Election hi ṭum danga thil thleng ngai lo a ni dawna ṭum dangah rorel lai beihrawn an nih laiin tunah chuan a malin tling turin kan bei ṭheuh a ni," a ti.

Zodintluanga chuan ṭum danga Bye Election a danglam zia sawiin, "Bye election dangah chuan rorellai hneh loh in ringin kan insawmkhawma kan beihrawn ṭhin a. Tunah erawh tlin in beisei ṭheuhin party tinin inthlan kan hmasawn a, hei hian Bye election danglam tak a nih zia a tarlang," tiin a sawi.

Serchhip Bye Election-ah hian Congress party chu an phur hle tih sawiin, "Serchhip inthlanah hian Congress party chu ruhrel lian tak a nih angin an rawn phur hle a, party rilru pumite an rawn che chhuak mek a, kan chak ngei dawn tih a chiang a ni," a ti.

"Hetia bye Election-a ruling Candidate-te beih rawn ngai lo a, hneh theih ngei kan in ringna chhan chu MNF sorkar kum thum kal mekah hian mipui an beidawng a, an MLA-te an Minister-te hun reilote chhungin nasa takin an mualpho a. An Party worker-te an inluling nasa em em a. Kan Budget pharh takah khan ram tan hmasawnna engmah hmuh tur a awm bawk lo a ni," a ti bawk.