Aizawl: Naktip Thawhlehni atanga Assembly session neih tan turah Zirtawpni thleng khan bill lut a law awm lo.
Assembly Secretariat atanga thudawn danin Zirtawpni thleng khan tun session-a chhan tur hian zawhna starred question 40, ziaka chhan chi zawhna unstarred question 139 bakah private member resolution 44 a lut tawh a ni. Zalen thudawn danin sawrkar lam chuan tun tum session-ah hian bill 7 vel putluh an tum a, heng zingah hian zu khapna dan pawh putluh tum a ni.
Speaker Lalrinliana Sailo hova Bussiness Advisory Committee thukhawm chuan session hi March 20, 2019 thleng neih turin a rel a. Session tan ni, March 12 hian Governor-in thu a sawi ang a, a tuk March 13-ah sunna hun hman tur a niin session neih kar laka boral MLA hlui F.Manghnua sun a ni ang a, zawhna leh chhan hun hman zawhah Larsap thusawi vanga lawmthu sawina hun hman a ni ang. March 14-ah zawhna leh chhanna hun hman zawhah sawrkar thil pawimawh sawiho a ni ang a, March 15-ah zawhna hun hman zawhah private member resolution sawiho a ni ang. March ni 18 ah zawhna hun hman zawah sawrkar thil pawimawh tih a ni ang a, March 19-ah thla 3 chhunga sawrkar sum hman tur ‘vote on account’ leh kum kaltaa sawrkar sum indaih loh dil belhna pharh a ni ang. March 20-ah zawhna leh chhanna hun hman leh a ni ang a, sum hman turte pass tum a ni bawk ang.