ZALEN August 24, 2023 : Chief Minister Zoramthanga chuan 12th Session of the 8th Mizoram Legislative Assembly, August ni 22 & 23, 2023 a neihah Bill pariat (8) putluh niin pawm vek a ni leh "The Forest (Conservation) Amendment Act, 2023" dodalna resolution chu lungrual taka pass a ni chu lawmawm a tih thu Instgram-ah a post.

Forest (Conservation) Amendment bill chungchang chu hriat tirh phat aṭangin zirchianna neih nghal a ni a. Centre pawhin August ni 2, 2021 ah Mizoram ngaihdan rawn zawtin meeting neih nghal a ni a. October ni 21, 2021 ah duhlohna chu ziaka thlen a ni, June ni 6, 2023 khan bill duh lohna thu bawk hi PCCF hmingin Lok Sabha Secretariat ah thlen nawn leh a ni a, JPC ah thlen a ni bawk, a ti.

He bill chungchanga duhlohna hi thlen ni mah se, Parliament House pahnihah bill chu pawmin "The Forest (Conservation) Amendment Act, 2023" chu a lo piang ta a. Amaherawhchu MNF Party chu ram leh hnam tana ding a nih angin MNF Legislature Party (MLP) pawhin dinna a tichiang a. MNF kaihhruai Sawrkar chuan ram, hnam leh sakhaw tana pawi thei leh ram mipuite tana nghawng ṭhalo awm thei chu a dodal zel dawn a ni a ti. Thuthlung nghet taka vuan chungin "The Forest (Conservation) Amendment Act, 2023" dodalna resolution, Forest Minister TJ Lalnuntluanga putluh chu House-in lungrual takin a pawm a, kan dikna chanvo humhim nan leh ram mipuite hmakhua dawn chunga House Official Resolution hi Mizoram tan pawh thil chhinchhiahtlak a ni, a ti.