Aizawl June 2, 2024 : Chief Minister Lalduhoma chuan, “Ruihhlo Setana bumna hi Pathian chakna hmanga kan do chuan kan hneh thei a ni,” a ti.

Mizoram Police buatsaihin nimin zing khan Chanmari atanga Lammual thleng ruihhlo do kawngzawh, ‘Drugs free Mizoram Walk 2024’ neih a ni a. Kawngzawh kharna inkhawm, Lammuala neihah chief minister chuan ruihhloin thalaite a suat nasa tih sawiin, “Ruihhlo hian thalai, a bikin mipa min suat nasa hle a. Khawvela damrei lo ber hnam kan ni a, hetiang zela kan kal chuan nakin lawkah chuan mipa leh hmeichhe inbuk tawk lo kan ni thuai dawn a, fahrah leh hmeithai an tam ang a, nulaten pasal neih tur an hmu dawn lo a ni,” a ti.

Chief minister chuan, “Chak zawka ruihhlo do kalpui a nih theih nan hun eng emaw chen lo thukhawm tawh ngai lo, Ruihhlo Do Core Committee pawh kan tuai thar a, supply lam tih tlem hna hi Excise & Narcotics department lam mawhphurhnaah dahin demand tihtlem lam hi Social Welfare kutah kan dah a, fel takin hmalak dan tur kan thliar a. Central YMA kutah kan innghat thuk hle a ni,” a ti.

Drugs do kawng ah sawrkarin theihtawp a chhuah dawn tih sawiin Lalduhoma chuan, “Drugs dona atan hian sum leh pai kan ui dawn lo va, dan pawh siam that kan tum mek a. Kan society mualphona thlentu tibo turin theih tawp chhuah ang u,” tiin kalkhawmte a sawm a ni.

Thusawitu dang, Home Minister K.Sapdanga chuan, “Drugs avangin Mizo thalaiten nun an chân nasa a, namen lova kan do a ngai a. Drugs hmanga sumdawng leh buaipuitute hi mi tam an ni lo va, a nghawng erawh a nasa a. Tangruala kan do chuan a rem loh pawhin a ziaawm thei a ni,” a ti.

Excise & Narcotics Minister Lalnghinglova Hmar pawhin, “Ruihhlo do kawngah hian sawrkarin a malin thil a ti thei lo a. Tlawmngai pawl, kohhran leh kan zavaia kan do chuan a ziaawm thei a ni,” a ti bawk.

Drugs Free Walk kharna inkhawm hi Anil Shukla, IPS, DGP Mizoram chuan a kaihruai a, Lalbiakthanga Khiangte, IGP chuan lawmthu sawiin inkhawm a khar a ni.

Lammuala hun hmannaah hian kalkhawmte chuan thutiam (pledge) sawi rualin ‘Ruihhlo do turin ka theihtawp ka chhuah zel ang’ tiin an intiam a ni.