Jennifer Lawrence tih te, Ariana Grande tih angrengte pawh tunlai chu an buai fu, iCloud account atanga an thlalak an ruk chhuah sak avangin an ‘mimal thil’ thlengin khawvelin a hmuh sak a, a then erawh chu an siam chawp niin, a lem awm ve bawk mah se, a tam zawk erawh a lem a ni lem lo tih a chiang a. Anmahni pawhin an pha hlei thei lo a ni ber e. Chutiang boruaka an chen ve laiin, keini lamah pawh sex video chungchangah sawi neuh neuh tur a rawn awm thar leh ta tlat mai. Showbiz khawvelah tunlai na na na chu ruaka thlalak 'leak' chungchang hian a bawr hneh viau a, an la inkhing tak tak chho zel dawn niin a lang a, an la in chhui chho mek zel bawk. A thenin thlalak an ruksak te thlavang an lo hauh thul — chu chu anni lam chanchin a ni. Keini lamah pawh hian, tunhnaiah kan mi larte zingah 'sex video scandal' a rawn awm chho leh nawk mai. WhatsApp lamah pawh an inthawn darh nasa viau. Mahse, an puh ber erawh chuan a nih loh thu a sawi. Tunhnaiah sex video pakhat chu mobile phone lamah kawl pawh an awm fur tawh. he sex video hi kan hmeichhe zaithiam pakhat nia puh a ni a. Chu video chu WhatsApp lamah pawh a darh chak viau a, group hrang hrangah pawh 'khel' a hlawh chho viau tawh niin a lang. Hemi chungchangah Feli Fanai kan be thei hlauh mai a, amah nia an puhna video pawh a en tawh thu a sawi a, a ni chuan amah a nih loh thu chiang taka sawiin, "A inan pawh kan inang lo hrim hrim. Sex video nei anga min ti hrim hrim pawh ka thin a rim. Min ti mualpho duhtu ka tawng kha pawi ka ti. Ka tawngtai sak chak zawk. A rilru a chhia ka ti," a ti. Feli chuan amah an puh chungchang hi a hriatna pawh a la rei lem lo niin a sawi leh a, "September ni 3, 2014 tlai lam khan ka hre ve chiah a, ka thiante'n min rawn hrilh a. 'I sex video vel chu enge omzia' min ti a. Ka la bangbo lutuk chutah chuan. Mahse, min lo screenshot sak ta a. Chuta tang chuan ka hre ve chauh a ni," tiin a sawi bawk. A sawi zawm zelin, "Khawi atanga he thil hi rawn irh chhuak nge tih hriat ka chak. A titu reng reng hi hriat ka chak tawp. Ka thin hi a rim tawp a, FIR pawh kan theh lut hial dawn emaw ni kan ti," tiin Feli chuan thubuai ziah luh chungchang pawh an ngaihtuah hial thu a sawi bawk a ni.