ZALEN December 05, 2025 : Mizoram Motorsports season kharna LBS Suzuki Racing Championship neih mekah zirtawpni thlengin intlansiak eng emaw zat zawh tawh a ni a, inrinniah inelna zo felin concert nen khar a ni dawn.

Tuirial Airfield-ah nilaini atangin Mizoram State Sports Council kum 50 tlin lawm ni nghal championship tan a ni a. Kawng chhiaa bike intlansiak moto-cross expert-ah Ground Rule rider Shaun Lalremruata Chhangte a champion a, BVP Amawii Hero rider pahnihin dawtin C Vanlalduhsaka chu pahnihna a ni a, B Lalruatsanga chu pathumna a ni bawk.

Vawi hnih intlansiakin a hmasa zawkah Shaun-a a chak ber a, a dawtah pahnihna niin a belh khawmah point 45 a hmu a, a hnung hnung zawka chak ber Duhsaka chu a hmasa zawkah che tha lovin palina a ni a, a pum puiah point kuain Shaun-a aiin a hniam a ni.

Tlankawnga bike intlansiak expert 165 cc-ah Daniel Lalhriatkima a chak ber a, a elpui Lalnunsanga chuan dawtin pathumnaah Hmangaihfamkima a awm a ni. Vawi hnih intlansiakin a hnuhnung zawkah Daniel-a a chak ber a, a hmasa zawkah Nunsanga a chak teuh hle a, pahnihnaah a thleng a ni.

165 cc inelna dang novice-ah Lalhruaisanga chak berin Eliazar Lalthlamuana'n a dawt a, mi thar huangah Lalruathlua chu pakhatna a ni ve thung a, pahnihnaah Laltleipuia a thleng a ni.

Naktukah inelna hrang hrang final vek a ni dawn a, zing dar 9-ah tannin kawng ngila car intlansiak leh two wheeler intlansiak neih a ni ang a, motocross-ah novice leh open inelna zawh a nih dawn bakah championship sponsor LBS Suzuki pualin V Strom bike inelna a awm tel ang.

Tlankawnga intlansiak chi hrang hrang neih zui a ni dawn a, LBS Suzuki staff-te tan scooter intlansiak huaihawt telin Suzuki Gixxer One Make Race a awm bawk ang.

Intlansiak zawh a nih hnu tlai dar 4:30 atangin concern tan a ni dawn a, Bzi Tochhawng, Mary Dawngi, Young Fella leh Medal an zai dawn a, guitaris Victor the Scavenger leh LBS Durian Furniture Commedian Search-a pakhatna Lalhriatpuia te an che dawn bawk a ni.