India hmarchhaka band intihsiakna lian leh ngaihven hlawh ber pakhat ShiRock-ah Mizo band tha The Prophets ten final an lut a, nimin khan Aizawl chhuahsanin Manipur an pan. 'Biggest Rock Contest in India' an tih hial ShiRock band contest hi India rama band tha ber berte intihsiakna niin, finalist zingah Mizo band an tel hi a lawmawm hle - zaninah an inlan ang. 

Manipur sawrkar chuan kumtin 'Shirui Lily Festival' a buatsaih thin a, festival lawmna hi Shirui, Ukhrul-ah neih thin a ni. Kum 2017 khan 'Shirui Lily Festival' hi Manipur sawrkar chuan state festival atan a lo puang tawh nghe nghe a, ni li chhung a awh thin. 

He festival-ah hian cultural event, artifact, game, music leh food stall te buatsaih thin a ni a, chung zinga ngaihven hlawh tak chu music huanga ShiRock hi a ni. ShiRock hi band intihsiakna niin, India rama band tha ber ber an inlan thin - a tawp zanah international band tha an perform thin bawk. Kumin hian British metal band Monuments te an inlan dawn a, ShiRock winner te an perform bawk ang. 

ShiRock-ah hian lawmman a tha thaw khat thin hle - kumin hian pakhatna ten Rs. 10 lakhs an dawng dawn a, pahnihna leh pathumna ten Rs. 4 lakhs leh Rs. 2.5 lakhs an dawng bawk ang. 'Biggest Rock Contest in India' an tih hialah hian Mizo band The Prophets te hi finalist an ni a, hlawhtlinna chang ngei turin Zalen chuan duhsakna kan hlan e.