ZALEN February 3, 2025 : Chinland Defense Force (CDF) leh Matu Defense Force (MDF) te inkara Matupi District, Myanmar-a inkahna thlenga MDF sipai hliam pahnih te chu Mizoram-a enkawl turin rawn hruai an ni a, Maraland Gospel Centenary Hospital-ah zai an ni.

Thu lakna in a tarlan danin pawl pahnih inbeihnaah hian CDF mi leh sa 14 vel chu an hliam niin tarlan a ni a, mi pali chuan hliam nasa tak an tuar. Bomb hmanga inbeihnaah hian MDF mi leh sa engemaw zat chuan hliam hi an tuar ve bawk. Heng hliam zinga MDF sipai pahnih hi Mizoram-ah rawn phurh thlen niin, Maraland Gospel Centenary Hospital-ah dahluh an ni.

Mizoram-a hliam an rawn hruai te hi Matupi District, Myanmar mi ve ve niin pakhat zawk Vachokhai (19) chu a ke dinglam kheimit bawrah a ke tan sak a ni a, pakhat zawk Beingachhi (22) pawh hi a ke veilam kheimit bawrah tan sak a ni bawk.

He inkahna hi January 30, 2025-a thil thleng kha niin MDF te hian Zumah, Matupi District, Chin State-a CDF camp an beih avanga chhuak a ni a, an inbeihna hi India leh Myanmar ramri atanga Km 50 vela hla a ni.

ZORO (Zo Reunification Organization) leh YMA (Young Mizo Association) te chuan heng pawlte hi tum tam tak inbiakna neihpuiiin an inkarah harsatna inthlen tawn lo turin hma an la thin a, an mite harsatna nasa tak a thlen phah an ti a, chutihrualin an buaina hian ziaawm lam a pan thei lo.

Chinland Defense Force (CDF) leh Matu Defense Force (MDF) te hi Myanmar sipai laka na taka chetna Chin State, Myanmar chhunga inkulh ralthuam keng pawl an ni a, chungnung zawk nih tumna leh an ramri buaina chu tuna tharum thawhna a thlen chhana ngaih a ni. Pawl pahnih te hian Myanmar sipai chu bei ho thin mah se, an inkarah remna tluantling erawh a awm thei rih lo.

CDF te hi Chin National Organization thlazar hnuaia che thin an ni a, National Unity Government (NUG) te nen pawha inzawm an ni, hetihlai hian MDF te hi chu Matu ethnic group aiawh niin, Matupi District-a anmahni rorelna tura hmalatu an ni thung.

Heng hnam bil ralthuam keng te inbeihna chhan ber hi chu an ramri buaina vang nia ngaih a ni.