Aizawl July 11,2022: Siaha district bawrhsap Lalsangliana chuan Inrinni khan Lana (Ainak) leh Siasi khua te a tlawh leh a, Siaha district chhunga khua te a tlawhchhuak kim ta chiah a ni.

Lalsangliana hian February 8, 2022 khan Siaha district-ah bawrhsap hna a zawm a. Siaha district-a bawrhsapa a nih hnuah Siaha town chhunga Gov't of Mizoram hnuaia office a  tlawhchhuah vek a, Head of Office te leh an staff te hnena inhmelhriattira, an office hmalakna leh harsatna te hriatpui a, an harsatna te chu Aizawla an Head of Department theuh te hnena thlen sak a ni. Ni 4 chhungin Siaha town chhunga Sawrkar Pisa zawng zawng tlawhchhuak vek a ni

Office a tlawhchhuah vek hnu hian Siaha District chhunga khaw 48 te chu tlawhchhuak vek tumin hma a la leh a, 12th MADC General Election in a village tour hi tihkhaihlak deuh mah se vawiin  khan district chhunga khaw awm 48 chu a tlawh chhuak kim ta ni.

Lalsangliana hian a Village tour nan hian Holiday leh kartawp chawlh a hmang ber a, office kal ni pangaiah a tour ngai lo a ni. Thingtlang khua a tlawhna chhan sawiin Lalsangliana chuan, "Khawtin ka tlawh hian an khaw chanchin leh a micheng te chanchin ka hriat bakah, an harsatna leh mamawh te an hmunah ngei kal chilh a, ka hmupui hian a chiang ber a ni. Hei bakah hian DC an lo hmelhriat  ve hi hlu ka ti a, an khuaah ngei ka tlawh hian in hmelhriatna tha leh inthianthatna tha a hrinchuah ngei ka beisei tlat a ni," a ti.

Khaw hrang hrangah DC hi an lo lawm hlawm hle a, kum tam tak DC hmel hmu tawh lo khua te phei chuan a khawnawtin an lo hmuak  thin a ni.