July 4, 2022; Damlo chunga dik lo taka chea puh, Dr. Linda Lalbiaknungi, Sialsuk Primary Health Centre (PHC)-a medical officer chet dan chhui chiang tura ruat, Aibawk BDO in a thil hmuhte sorkara a thehluh chu um zui tlakah ngaiin, Mizoram sawrkar a health department chuan 'Memorandum of Charge' (chargesheet) a buaipui mek nia thudawn a ni.

ZALEN thudawn danin, Health & Family Welfare department in 'preliminary enquiry' ti tura a ruat, Aibawk BDO in sawrkar a report a thehluh chu health department chuan um zui tlakah a ngai a, tun dinhmunah Memorandum of Charge buaipui mek niin, Dr. Linda Lalbiaknungi pawh insawifiahna hun pek a la ni dawn nia hriat a ni. Memorandum of Charge a chhui/puh a nihna a pawm chuan chhui ngai lo a ni ang a, chhui a nihna a pawm loh erawh chuan enquiry neih chhoh zel tur a ni dawn nia hriat a ni bawk.

Damlo chunga Dr. Linda Lalbiaknungi chet dan leh damlo Lalrengpuia, Sialsuk chunga a thil tih dante'n tun hnaiah social media hrang hrangah sawi a hlawh hle a, Dr Lalbiaknungi chu damdawi-in atanga Lalrengpuia hnawt chhuakah puh a ni.

Social media lama tarlan danin, Dr. Linda Lalbiaknungi hian canteen-ah Rs 1,000 a ti bo a, pawisa rutuah Sialsuk damdawi-ina damlo enkawl lai Lalrengpuia chu puhin, damdawi-in atangin a hnawt chhuak a ni. Lalrengpuia chu damdawiin atanga a chhuah tukah a thi nia sawi a ni bawk. Lalrengpuia hi damdawiin atangin May 12, 2022-ah chhuahtir a ni a, May 13, 2022 zanah a thi.

Sawrkar hmalakna:-

• Sialsuk PHC-a medical officer Dr. Linda Lalbiaknungi chet dan leh damdawiin a damlo enkawl lai Lalrengpuia chhuahtir chungchang chhui chiang turin, June ni 1, 2022 khan Aibawk BDO Chinlianmanga a ruat a. June 10, 2022 ral hmain HFW Secretary hnenah report thehlut tura tih a ni.
• Aibawk BDO in huntiam chhungin a report sawrkar ah a thehlut.
• June ni 2, 2022 atang khan chawlhtir (suspend) a ni a, hotu lu atanga phalna la hmasa lo chuan Aizawl chhuahsan lo tura hriattir a ni. 
• Sialsuk PHC vil rih turin ZMC-a medical officer Dr HJ. Lalnunpuia a ruat a, a hna pangngai bakah chawlhkar khatah vawi thum tal Sialsuk PHC tlawh tura tih a ni.